ಕಾರ್ಕಳ(ಕುಲಾಲ ವರ್ಲ್ಡ್ ಡಾಟ್ ಕಾಮ್) : ಸಮಾಜಮುಖಿ ಕಾರ್ಯಗಳಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿರುವ ‘ಕುಲಾಲ ಚಾವಡಿ’ ವಾಟ್ಸಪ್ ಬಳಗದ 35ನೇ ಸೇವಾ ಯೋಜನೆಯಡಿ ನಿರ್ಮಾಣ ಹಂತದ ಮನೆಗಳ ಕಾಮಗಾರಿಗಾಗಿ ಇಬ್ಬರು ಫಲಾನುಭವಿಗಳಿಗೆ ಒಟ್ಟು ₹1 ಲಕ್ಷ ಆರ್ಥಿಕ ನೆರವು ವಿತರಿಸಲಾಯಿತು.
ಸಂಸ್ಥೆಯ ಚಟುವಟಿಕೆಗಳಿಗೆ ತುಸು ಬಿಡುವು ಬಿದ್ದಿದ್ದ ಸಂದರ್ಭದಲ್ಲಿ, ಸಂತ್ರಸ್ತರ ಅಹವಾಲುಗಳಿಗೆ ಸ್ಪಂದಿಸಿದ ಬಳಗವು ವಿಶೇಷ ಅಭಿಯಾನದ ಮೂಲಕ ದೊಡ್ಡ ಮಟ್ಟದ ಸಹಾಯಧನವನ್ನು ಕ್ರೋಢೀಕರಿಸಿದೆ. ಮುಂಬೈನ ಉದ್ಯಮಿ ಹಾಗೂ ಬಳಗದ ಸಹ ನಿರ್ವಾಹಕರಾದ ಜಗದೀಶ್ ಕಲ್ಲೋಡಿ ಅವರ ಸಾರಥ್ಯದಲ್ಲಿ ಈ ಸಹಾಯಧನ ಸಂಗ್ರಹ ಅಭಿಯಾನ ಯಶಸ್ವಿಯಾಗಿ ನೆರವೇರಿತು.
ಹಿರ್ಗಾನ ಹಾಗೂ ಸಿದ್ಧಕಟ್ಟೆಯ ಕುಟುಂಬಗಳಿಗೆ ನೆರವು
ಕ್ರೋಢೀಕರಣಗೊಂಡ ಒಟ್ಟು ಮೊತ್ತದಲ್ಲಿ ಮಂಗಿಲ್ಲಾರು ಲಕ್ಷ್ಮಣ ಮೂಲ್ಯ (ಹಿರ್ಗಾನ): ಇವರ ನಿರ್ಮಾಣ ಹಂತದ ಮನೆಯ ಮುಂದಿನ ಕಾಮಗಾರಿಗಾಗಿ ₹30,000 ಧನಸಹಾಯ ನೀಡಲಾಯಿತು. ಜಯಂತಿ ಮೂಲ್ಯ (ಸಿದ್ಧಕಟ್ಟೆ) ಇವರ ಮನೆ ನಿರ್ಮಾಣಕ್ಕಾಗಿ ₹67,000 ನೆರವು ಹಸ್ತಾಂತರಿಸಲಾಯಿತು.
ಶ್ರಮದಾನ ನಿರತ ಯುವಕರಿಗೆ ಪ್ರೋತ್ಸಾಹ :
ಸಾಮಾನ್ಯವಾಗಿ ಸಂತ್ರಸ್ತರನ್ನೇ ಕರೆಸಿ ಸಹಾಯಧನ ನೀಡುತ್ತಿದ್ದ ಕುಲಾಲ ಚಾವಡಿ ಬಳಗ, ಈ ಬಾರಿ ಸ್ವತಃ ಫಲಾನುಭವಿಯ ಮನೆಬಾಗಿಲಿಗೆ ತೆರಳಿ ನೆರವು ನೀಡಿದೆ. ಸಿದ್ಧಕಟ್ಟೆ ವಲಯದ ‘ಕುಲಾಲ ಸುಧಾರಕ ಸಂಘ’ ಹಾಗೂ ಗಾಡಿಪಲ್ಕೆಯ ಉತ್ಸಾಹಿ ಯುವಕರ ತಂಡವು ಭಾನುವಾರದ ರಜಾದಿನದಲ್ಲೂ ಬಿಸಿಲನ್ನು ಲೆಕ್ಕಿಸದೆ ಜಯಂತಿ ಮೂಲ್ಯ ಅವರ ಮನೆ ನಿರ್ಮಾಣಕ್ಕಾಗಿ ಶ್ರಮದಾನ ನೀಡುತ್ತಿದ್ದುದನ್ನು ಕಂಡ ಬಳಗದ ಪದಾಧಿಕಾರಿಗಳು, ಯುವಕರ ಸಮಾಜಮುಖಿ ಸೇವೆಯನ್ನು ಶ್ಲಾಘಿಸಿ ಅಭಿನಂದಿಸಿದರು.
ಈ ಸೇವಾ ಕಾರ್ಯಕ್ರಮದಲ್ಲಿ ಕುಲಾಲ ಚಾವಡಿಯ ಕಾರ್ಯನಿರ್ವಾಹಕರಾದ ಸಂತೋಷ್ ಕುಲಾಲ್ ಪದವು, ಸುಧೀರ್ ಬಂಗೇರ ಕೆರ್ವಾಸೆ, ದೇವಪ್ಪ ಕುಲಾಲ್ ನಿಟ್ಟೆ, ಸಂತೋಷ್ ಕುಲಾಲ್ ಇರ್ವತ್ತೂರು, ಸತೀಶ್ ಕಜ್ಜೋಡಿ, ಸುಮತಿ ಕುಲಾಲ್ ಸಾಣೂರು, ಸಂದೇಶ್ ಕುಲಾಲ್ ಹಿರ್ಗಾನ ಹಾಗೂ ಸಿದ್ಧಕಟ್ಟೆ ಕುಲಾಲ ಸಂಘದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.
