ಪುತ್ತೂರು(ಕುಲಾಲ್ ವರ್ಲ್ಡ್ ಡಾಟ್ ಕಾಮ್): ಪುತ್ತೂರ ತಾಲೂಕುದ ಉಡ್ಡಂಗಳ ಮಣ್ಣ್ ದ ಕರ ಮನ್ಪುನೆಟ್ ಬಾರೀ ಪುಗರ್ತೆದ ಜಾಗೆ.ಒಂಜಿ ಕಾಲೊಡು ಮುಲ್ಪದ ಕುಟುಂಬೊಲೆಗ್ ಜೀವನ ನಿರ್ವಹಣೆಗ್ ಕುಂಬಾರಿಕೆನೇ ಮುಖ್ಯ ಕಸುಬಾದಿತ್ತ್ಂಡ್. ಇತ್ತೆ ಮುಲ್ಪ ರಡ್ಡ್ ಕುಟುಂಬೊಲು ಮಾತ್ರೆ ಕರ ಮನ್ಪುನ ಬೇಲೆ ಮನ್ತೊಂದು ಕುಲ ಕಸುಬುನು ಒರಿಪಾವೊಂದು ಬೈದೆರ್.
ಎಲ್ಯ ಪ್ರಾಯೊಡೆ ಕರ ಮನ್ಪುನೆನ್ ಕಲ್ತ್ ದ್ ಒರಿತೊಂದು ಬೈದ್ ನ ಬಾಬು ಮೂಲ್ಯೆರೆ ಕೈಟ್ ಸುಮಾರ್ ನಮೂನೆದ ಪಾತ್ರೆಲು ನಿರ್ಮಾಣ ಆತ್ಂಡ್. ದುಂಬುದ ಕಾಲೊಡು ಗಳಸೊಂದು ಇತ್ತೆ ಅಪರೂಪ ಆಯಿನ ನೀರ್ ಮೈಪುನ ಕಡ್ಯ, ಗಂಜಿ ಕಬಿಡುನ ಅಡ್ಯರ, ಅಪ್ಪದ ಕಾವಲಿ ಪೊರಿಪೋದ್ಪುನ ಕರ…ಇಂಚಿತ್ತಿ ಸಾಂಪ್ರದಾಯಿಕ ರೂಪೊಲೆನ್ ಲಾ ತಯಾರ್ ಮನ್ಪುನ ವಿಧಾನಲಾ ಒರಿತೊಂದು ಬೈದೆರ್.ಅಗತ್ಯ ಇತ್ತ್ ನಕುಲೆಗ್ ನಿರ್ದಿಷ್ಟ ರೂಪದ ಪಾತ್ರೆಲೆನ್ ತಯಾರ್ ಮನ್ತ್ ದ್ ಲಾ ಕೊರ್ಪೆರ್.
ಜೀವನಡ್ ಮಸ್ತ್ ಕಷ್ಟ , ಸವಾಲ್ ,ಸಮಸ್ಯೆಲ್ ಇತ್ತ್ ಂಡಲ ಕರ ಮನ್ಪುನ ಕಾಯಕೊನು ಬಾರೀ ನಿಷ್ಠೆಡ್ ಮನ್ತೊಂದುಲ್ಲೆರ್. ಕುಲ ಕಸುಬುನು ಒರಿಪಾವೊಂದು ಬತ್ತಿನ ಉಡ್ಡಂಗಳದ ಮೂಲ್ಯೆರೆ ಕುಟುಂಬಗ್ ಉಡಲ್ ದಿಂಜಿನ ಸೊಲ್ಮೆಲು.
ನಮ ಮಣ್ಣ್ ದ ಪಾತ್ರೆ ಉಪಯೋಗ ಮನ್ತ್ ದ್ ಪ್ರೋತ್ಸಾಹ ಕೊರುಂಡನೇ ಬಂಙದ ಈ ಕುಲಕಸುಬುನು ಒರಿಪೆರೆ ಸಾಧ್ಯ. ಇಂದೆನ್ ಮನ್ಪುನಕುಲೆಗ್ ಉಮೇದ್ ಪುಟ್ಟಾಯೆರೆ ಸಾಧ್ಯ. ಕರ ಮನ್ಪುನ ಕಾರ್ಯಕ್ರಮ ಬೊಕ್ಕ ಪ್ರದರ್ಶನೊಲೆಡ್ ಲಾ ಇಂಬೆರ್ ಭಾಗವಹಿಸ್ ದೆರ್.
ಕೆಲವು ವರ್ಷಗ್ ದುಂಬು ಉಪ್ಪಳದ ಕೊಂಡೆವೂರುಡು ನಡತ್ ನ ಮಲ್ಲ ಯಾಗದ ಪಾತ್ರೆ ಕಲಶೊಲೆನ್ ಸಾಂಪ್ರದಾಯಿಕ ರೀತಿಡ್ ಮನ್ತ್ ನ ಸಾಧನೆ ಇಂಬೆರನವು. ಕರ ಮನ್ಪುನ ಕಲ್ಪೆರೆ ಉಮೇದ್ ಇತ್ತ್ ನಕುಲೆಗ್ ಕಲ್ಪಾಯೆರೆಲಾ ಇಂಬೆರ್ ತಯಾರುಲ್ಲೆರ್.ನನಲಾತ್ ತಗೋರಿ ತಿರ್ಗೊಡ್..ಮಣ್ಣ್ ದ ಕಸುಬು ಪರಪೋಕುದ ಪುರಪು ಒರಿಯೊಡು.
✍️ಶಕು (ಶಂಕರ ಕುಂಜತ್ತೂರು)