ಬಂಟ್ವಾಳ(ಕುಲಾಲ ವರ್ಲ್ಡ್ ಡಾಟ್ ಕಾಮ್): ಇಲ್ಲಿನ ವೀರಕಂಭ ಗ್ರಾಮದ ಮಜಿ ಎಂಬ ಪುಟ್ಟ ಊರಿನಲ್ಲಿ ಇಂದು ಕೇಳಿಬರುತ್ತಿರುವ ಯಶೋಗಾಥೆಯ ಹಿಂದೆ ಒಬ್ಬ ಮಗಳ ಕೃತಜ್ಞತೆ ಮತ್ತು ಒಬ್ಬ ತಾಯಿಯ ಬೆವರಿನ ಹನಿಗಳಿವೆ.
ಆಧುನಿಕತೆಯ ಅಬ್ಬರದಲ್ಲಿ ಕುಲಕಸುಬುಗಳು ಕಮರಿ ಹೋಗುತ್ತಿರುವ ಕಾಲಘಟ್ಟದಲ್ಲಿ, ಪ್ರಚೀನ ಕುಮಾರಿ ಎಂಬ ಮಹಿಳೆ ಮಣ್ಣಿನ ಮಡಕೆಗಳ ಮೂಲಕ ತನ್ನ ಬದುಕಿಗೆ ಬಣ್ಣ ತುಂಬುತ್ತಿದ್ದಾರೆ. ಆದರೆ ಈ ಸಾಧನೆಯ ದಾರಿ ಸುಲಭದ್ದಾಗಿರಲಿಲ್ಲ; ಅದು ಹಳೆಯ ನೆನಪು ಮತ್ತು ಅಮ್ಮನ ಮೇಲಿನ ಪ್ರೀತಿಯಿಂದ ಕೆತ್ತಲ್ಪಟ್ಟ ಹಾದಿ.
ಒಂದು ಕಾಲದಲ್ಲಿ ಕಂಪ್ಯೂಟರ್ ಆಪರೇಟರ್ ಆಗಿ ಕೀಬೋರ್ಡ್ ಮೇಲೆ ಬೆರಳು ಆಡಿಸುತ್ತಿದ್ದ ಪ್ರಚೀನ ಅವರಿಗೆ, ಮದುವೆಯ ನಂತರ ಎದುರಾದದ್ದು ಅನಿಶ್ಚಿತತೆ. ಕೊರೊನಾ ಎಂಬ ಮಹಾಮಾರಿ ಬದುಕಿನ ದಿಕ್ಕನ್ನೇ ಬದಲಿಸಿ ಕುಶಾಲನಗರದಿಂದ ಮತ್ತೆ ಹುಟ್ಟೂರಿಗೆ ಬರುವಂತೆ ಮಾಡಿದಾಗ, ಕಣ್ಣಮುಂದೆ ಇದ್ದಿದ್ದು “ಮುಂದೇನು?” ಎಂಬ ಕಗ್ಗಂಟು. ಆ ಕತ್ತಲೆಯಲ್ಲಿ ಅವರಿಗೆ ಬೆಳಕಾಗಿ ಕಂಡಿದ್ದು ಅಮ್ಮ ಲೀಲಾವತಿ ಅವರ ಹೋರಾಟದ ಬದುಕು. ಮಡಕೆಗಳನ್ನು ತಲೆಯ ಮೇಲೆ ಹೊತ್ತು, ಊರೂರು ಅಲೆದು, ಕಷ್ಟಪಟ್ಟು ತನ್ನ ಮಕ್ಕಳಿಗೆ ಶಿಕ್ಷಣ ನೀಡಿದ್ದ ಅಮ್ಮನ ಆ ಮುಖ ಪ್ರಚೀನ ಅವರ ಕಣ್ಣೆದುರು ಬಂದು ನಿಂತಿತ್ತು. ಅಮ್ಮ ಪಟ್ಟ ಶ್ರಮಕ್ಕೆ ಗೌರವ ಸಲ್ಲಿಸುವುದು ಹೇಗೆ ಎಂಬ ಪ್ರಶ್ನೆಗೆ ಸಿಕ್ಕ ಉತ್ತರವೇ ಈ ‘ಮಣ್ಣಿನ ನಂಟು’.
ತನ್ನ ಕುಲಕಸುಬನ್ನೇ ಉಸಿರಾಗಿಸಿಕೊಂಡ ಪ್ರಚೀನ ಅವರಿಗೆ ‘ಸಂಜೀವಿನಿ’ ಸಂಘ ಆಸರೆಯಾಯಿತು. ಅಮ್ಮ ಪಟ್ಟ ಕಷ್ಟವನ್ನು ನೆನಪಿಸಿಕೊಳ್ಳುತ್ತಲೇ ವ್ಯಾಪಾರಕ್ಕಿಳಿದ ಅವರಿಗೆ ಪತಿಯ ಸಾಥ್ ಸಿಕ್ಕಿತು. ಅಮ್ಮನ ಕನಸನ್ನು ನನಸು ಮಾಡಲು “ಅಮೂಲ್ಯ” ಎಂಬ ಹೆಸರಿನ ಪುಟ್ಟ ಮಳಿಗೆ ತೆರೆದರು. ಇಂದು ಜಾತ್ರೆ, ಸಂತೆಗಳಲ್ಲಿ ಅವರು ಮಾರುವ ಪ್ರತಿಯೊಂದು ಮಡಕೆಯಲ್ಲೂ ಅಮ್ಮನ ಆಶೀರ್ವಾದವಿದೆ ಎಂಬ ನಂಬಿಕೆ ಅವರದ್ದು. ಕೇವಲ ಮಡಕೆ ಮಾರಾಟವಷ್ಟೇ ಅಲ್ಲದೆ, ಯೂಟ್ಯೂಬ್ ನೋಡಿ ಟೈಲರಿಂಗ್ ಕಲಿತು, ಪಶುಸಖಿಯಾಗಿಯೂ ಗುರುತಿಸಿಕೊಂಡಿರುವ ಇವರು ಇಂದು ಸ್ವಂತ ವಾಹನ ಖರೀದಿಸುವ ಹಂತಕ್ಕೆ ಬೆಳೆದಿದ್ದಾರೆ. “ನನ್ನ ಅಮ್ಮನಿಗೆ ಈ ಮಡಕೆ ವ್ಯಾಪಾರ ಎಲ್ಲೆಡೆ ಹರಡಬೇಕು ಎಂಬ ಆಸೆಯಿತ್ತು, ಅವರ ಆಸೆಯೇ ಇಂದು ನನ್ನ ಬದುಕಿನ ದಾರಿ” ಎಂದು ಪ್ರಚೀನ ಕುಮಾರಿ ಹೇಳುವಾಗ ಅವರ ಕಣ್ಣಾಲಿಗಳಲ್ಲಿ ಹೆಮ್ಮೆ ಮತ್ತು ಅಮ್ಮನ ಮೇಲಿನ ಅನುರಾಗ ಎದ್ದು ಕಾಣುತ್ತದೆ. ಶೂನ್ಯದಿಂದ ಎದ್ದು ಬಂದು, ಸಂಪ್ರದಾಯದ ಮಣ್ಣಿನಲ್ಲೇ ಯಶಸ್ಸಿನ ಬೆಳೆ ತೆಗೆದ ಈ ಮಗಳ ಸಾಧನೆ ಪ್ರತಿಯೊಬ್ಬರಿಗೂ ಸ್ಫೂರ್ತಿ.
