(ಕುಲಾಲ್ ವರ್ಲ್ಡ್ ಡಾಟ್ ಕಾಮ್, ೨೨,೦೩,೨೦೧೮)
ಮಂಗಳೂರು: ಆತ ಬಯೋಟೆಕ್ನಾಲಜಿ ಪದವೀಧರ. ಬಿಪಿಒ ಕಂಪನಿಯೊಂದರ ನಿರ್ವಹಣೆ ಬದಿಗಿಟ್ಟು ಈಗ ಮಾಡುತ್ತಿರುವುದು ದೇಸಿಯ ಪಿಝಾ! ಸಾಮಾನ್ಯವಾಗಿ ಪಿಝಾ ಹಟ್ ಎಂದರೆ ಕಣ್ಣೆದುರಿಗೆ ಬರುವುದು ಪಾಶ್ ಪಾಶ್ ಮಳಿಗೆ ಮತ್ತು ಅಲ್ಲಿನ ಬಿಸಿ ಬಿಸಿ ಓವನ್‌ಗಳ ಒಳಗೆ ಬೇಯುತ್ತಿರುವ ಕಲರ್‌ಫುಲ್ ಪಿಝಾಗಳು. ಆದರೆ, ಇಲ್ಲಿ ಅತಿ ಸಾಮಾನ್ಯ ಮನೆಯೊಳಗೆ ಪಿಝಾ ಬೇಯುವುದು ಮಣ್ಣಿನ ಒಲೆಯಲ್ಲಿ! ಇಲ್ಲಿರುವ ಲೋಟೆ, ತಟ್ಟೆ ಪಾತ್ರೆಗಳೆಲ್ಲವೂ ಮಣ್ಣಿನವೇ.. ನಿಜಾರ್ಥದಲ್ಲಿ ಇವರೊಬ್ಬ ಮಣ್ಣಿನ ಮಗ! ಇಂತಹುದೊಂದು ಡಿಫರೆಂಟ್ ಪಿಝಾ ‘ಹಟ್’ ಇರುವುದು ಮಂಗಳೂರಿನ ಜೆಪ್ಪು ಸಮೀಪದ ಕಾಸಿಯಾ ಹೈಸ್ಕೂಲ್ ಹಿಂಭಾಗದಲ್ಲಿ. ಇದರ ರೂವಾರಿ 33ರ ಹರೆಯದ ವೈಭವ್ ಭಟ್.
ಅಮ್ಮನ ಕೈರುಚಿ-ಮಗನ ಅಭಿರುಚಿ:
ಮೂಲತಃ ಉಪ್ಪಳದ ಬಾಯಾರು ನಿವಾಸಿಯಾಗಿರುವ ವೈಭವ್ ಭಟ್ ಡಿಫರೆಂಟ್, ಸ್ವಾದಿಷ್ಟ ಆಹಾರ ತಯಾರಿಕೆಯಲ್ಲಿ ಎತ್ತಿದ ಕೈ. ಮನೆಯಲ್ಲಿ ಅಮ್ಮ ಮಾಡಿಕೊಡುತ್ತಿದ್ದ ಪಿಝಾ ಮಾದರಿಯ ಡಿಫರೆಂಟ್ ಫುಡ್‌ಗಳನ್ನು ತಿಂದು ಬೆಳೆದವರಿಗೆ ಇದೊಂದು ಅಭಿರುಚಿಯಾಯಿತು. ಹಾಗಾಗಿ, ಇಟಲಿ ಪಿಜ್ಜಾಗೊಂದು ದೇಸೀಯ ಟಚ್ ನೀಡುವ ಕನಸು ಹುಟ್ಟಿತು. ಬಯೋ ಟೆಕ್ನಾಲಜಿ ಬಿಎಸ್ಸಿ ಪದವಿ ಬಳಿಕ ಮಂಗಳೂರಿನಲ್ಲೊಂದು ಬಿಪಿಒ ಕಂಪನಿ ನಡೆಸಲು ಶುರು ಮಾಡಿದ ಅವರು 2012ರಲ್ಲಿ ಪಣಂಬೂರು ಬೀಚ್‌ನಲ್ಲಿ ದೇಶೀಯ ಒಲೆಯಲ್ಲಿ ಪಿಝಾ ತಯಾರಿಸುವ ಹೊಸ ಪ್ರಯೋಗ ನಡೆಸಿದರು. ಆದರೆ, ಅಲ್ಲಿಯ ವಾತಾವರಣ ಮತ್ತು ಮಳೆಗೆ ಒಲೆಗಳು ಕರಗತೊಡಗಿದ್ದವು. ಆದರೆ, ಕನಸು ಕರಗಲಿಲ್ಲ.
ಧೃತಿಗೆಡದ ವೈಭವ ಭಟ್ 2013ರಲ್ಲಿ ಜೆಪ್ಪು ಸಮೀಪದ ಒಂದು ಹಳೆಯ ಮನೆಯನ್ನು ತಮ್ಮ ಹೊಸ ಪ್ರಯೋಗಕ್ಕೆ ಆಯ್ದುಕೊಂಡರು. ಇಲ್ಲಿ ಮಣ್ಣಿನ ಇಟ್ಟಿಗೆ, ಮರಳು, ಅವೆ ಮಣ್ಣು, ಸುಣ್ಣ, ಬೆಲ್ಲ ಮತ್ತು ಹುಳಿಗಳ ವಿಶ್ರಣದಿಂದ ಒಲೆ ತಯಾರಿಸುವ ಪರಿಣತರು ಅಪರೂಪ. ಹಾಗಾಗಿ ಕೇರಳದಿಂದ ಫ್ರಾನ್ಸಿಸ್ ಎಂಬವರನ್ನು ಕರೆದುಕೊಂಡು ಬಂದು ವಿಶೇಷ ಒಲೆ ತಯಾರಿಸಿದರು. ಅಂದಿನಿಂದ ನಾನಾ ಹೊಸ ಪ್ರಯೋಗಗಳ ಪ್ರಯೋಗ ಶಾಲೆಯಾಯಿತು ಈ ಪಿಝಾ ಹಟ್.. ಇದರ ಹೆಸರು ಸ್ಮೋಕ್ ಆಂಡ್ ಓವನ್ ಕೆಫೆ!
ಡಿಫರೆಂಟ್ ಟೇಸ್ಟ್:
ಧಗಧಗಿಸುವ ಬೆಂಕಿ, ಪಕ್ಕದಲ್ಲಿ ಇಟ್ಟಿಗೆಯ ಪದರ, ಅದರ ಮೇಲೆ ಬೇಯುವ ಪಿಝಾ… ಮುಚ್ಚಲೊಂದು ಬಾಗಿಲು.. ಹೀಗೆ ವಿಶಿಷ್ಟ ರೀತಿಯಲ್ಲಿ ರೂಪು ಪಡೆಯುವ ಪಿಝಾದ್ದು ಡಿಫರೆಂಟ್ ಟೇಸ್ಟ್. ನಿಜವೆಂದರೆ, ಇಟಲಿಯಲ್ಲಿ ಸಾಂಪ್ರದಾಯಿಕವಾಗಿ ಪಿಝಾ ತಯಾರಿಸುವುದೇ ಹೀಗೆ!: ವೈಭವ ಭಟ್ ಸ್ಥಳೀಯವಾಗಿ ಸಿಗುವ ತರಕಾರಿಗಳನ್ನೇ ಪಿಝಾಕ್ಕೆ ಬಳಸುತ್ತಾರೆ. ಸ್ವಲ್ಪ ಸಮಯದ ಹಿಂದೆ ತಾವೇ ತರಕಾರಿ ಬೆಳೆಸಿ ಬಳಸುತ್ತಿದ್ದರೂ ಈಗ ಅದನ್ನು ನಿಲ್ಲಿಸಿದ್ದಾರೆ.
ಸ್ವಂತ ರೆಸಿಪಿ, ಸಾಸ್:
ಪಿಝಾ ತಯಾರಿಯಲ್ಲಿ ತನ್ನದೇ ಸ್ಪೆಷಾಲಿಟಿ ಮತ್ತು ಪ್ರಯೋಗಗಳನ್ನು ಮಾಡುವ ವೈಭವ, ಇದಕ್ಕೆ ಬಳಸುವ ಟೊಮ್ಯಾಟೋ ಮತ್ತು ಚಿಲ್ಲಿ ಸಾಸ್‌ಗಳನ್ನು ತಾನೇ ತಯಾರಿಸುತ್ತಾರೆ. ಇಂತಹ ಕೆಫೆಗಳನ್ನು ಮಾಲ್‌ಗಳು ಅಥವಾ ಬೇರೆ ಕಡೆ ಮಾಡಲು ಆಗುವುದಿಲ್ಲ. ಏಕೆಂದರೆ ಆವೆ ಮಣ್ಣಿನ ಒಲೆಯಿಂದ ಬರುವ ಹೊಗೆ ಇತರರಿಗೆ ತೊಂದರೆಯಾಗುತ್ತದೆ. ಅದ್ದರಿಂದ ಇವುಗಳನ್ನು ಪ್ರತ್ಯೇಕ ಮನೆಗಳಲ್ಲೇ ಮಾಡಬೇಕಾಗುತ್ತದೆ ಅಂತಾರೆ ಭಟ್.
ಟೈಮ್ ಪಾಸ್‌ಗೆ ಗೇಮ್ಸ್:
ಸಾಮಾನ್ಯವಾಗಿ ಓವನ್‌ಗಳಲ್ಲಿ ಪಿಝಾ ತಯಾರಾಗಲು 10ರಿಂದ 15 ನಿಮಿಷ ಬೇಕಾಗುತ್ತದೆ. ಇಲ್ಲಿ ಕಟ್ಟಿಗೆ ಉಪಯೋಗಿಸಿ ಒಲೆಯಲ್ಲಿ ತಯಾರಿಸುವುದರಿಂದ 15ರಿಂದ 30 ನಿಮಿಷ ಬೇಕಾಗುತ್ತದೆ. ಇದಕ್ಕಾಗಿಯೇ ಇಲ್ಲಿ ಬರುವವರಿಗಾಗಿ ಚೆಸ್, ಲೂಡೊ ಮುಂತಾದ ಇನ್‌ಡೋರ್ ಗೇಮ್‌ಗಳನ್ನು ಇಡಲಾಗಿದೆ. ಬೇಕಾದವರು ಆಟವಾಡಬಹುದು.
ಮಣ್ಣಿನ ಪಾತ್ರೆಗಳ ಮೆರುಗು:
ವಿಶೇಷವೆಂದರೆ, ಇಲ್ಲಿ ಉಪಯೋಗಿಸುವ ಪ್ರತಿಯೊಂದು ಪಾತ್ರೆಯೂ ಮಣ್ಣಿನದು. ಲೋಟ, ಪ್ಲೇಟ್, ಬಟ್ಟಲು, ಪಿಂಗಾಣಿ ಎಲ್ಲವು ಮಣ್ಣಿನಿಂದ ತಯಾರಿರಾದ್ದವುಗಳು. ಇವುಗಳಲ್ಲಿ ಹೆಚ್ಚಿನವು ಪಿಲಿಕುಳದ ನಿಸರ್ಗಧಾಮದ ಗುಡಿಗಾರಿಕೆಯಲ್ಲಿ ತಯಾರಾಗಿರುವುದು. ಇಂತಹ ತಿಂಡಿಗಳ ನಡುವೆ ನಮ್ಮ ಮಣ್ಣಿನ ಸ್ವಾದವು ಇರಲಿ ಮತ್ತು ನಶಿಸುತ್ತಿರುವ ಪುರಾತನ ಕಲೆಯಾದ ಮಣ್ಣಿನ ಪಾತ್ರೆಗಳನ್ನು ಈ ಮೂಲಕ ಜನರಿಗೆ ತಿಳಿಸುವ ಪುಟ್ಟ ಪ್ರಯತ್ನ ಎನ್ನುತ್ತಾರೆ ಭಟ್. ಇವರಿಗೆ ಪಿಜ್ಜಾ ತಯಾರಿಯಲ್ಲಿ ಶ್ರೀನಿವಾಸ ಹೊಟೇಲ್ ಮ್ಯಾನೇಜ್‌ಮೆಂಟ್ ಕಾಲೇಜಿನ ವಿದ್ಯಾರ್ಥಿಗಳಾದ ಪವನ್, ರೋಹಿತ್,ವಿನೋದ್ ಮತ್ತು ಎಂಬಿಎ ವಿದ್ಯಾರ್ಥಿ ಸಿಜೋ ಏಸುದಾಸ್ ಸಂಜೆ ಹೊತ್ತು ಸಹಾಯ ಮಾಡುತ್ತಾರೆ. ಇವರಿಗೆ ಇದೊಂದು ರೀತಿಯ ಅಧ್ಯಯನವೂ ಹೌದು.
ರಾಮಣ್ಣ ವೈ. ಮಂಗಳೂರು
