ಕೆರೆಗೆ ತುಂಬಿತು ಜಲ, ಕುಂಬಾರಿಕೆ ವಿಲವಿಲ !

ತಿಕೋಟಾ: ವಿಜಯಪುರ ಜಿಲ್ಲೆಯ ತಿಕೋಟಾದಲ್ಲಿ ಕೆರೆಗೆ ನೀರು ಬಂದು ರೈತರು ಸೇರಿದಂತೆ ಬಹಳಷ್ಟು ಜನರಿಗೆ ಖುಷಿ ತಂದಿದೆ. ಆದರೆ ಕುಂಬಾರ ಸಮುದಾಯ ಮಾತ್ರ ಕೆರೆ ನೀರು ಬಂದಿರುವುದಕ್ಕೆ ತಾತ್ಕಾಲಿಕ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ಬಬಲೇಶ್ವರ ಹಾಗೂ ತಿಕೋಟಾ ತಾಲೂಕಿನ ಬಹುತೇಕ ಕೆರೆಗಳು ಬೇಸಿಗೆಯಲ್ಲೂ ನೀರಿನಿಂದ ನಳನಳಿಸುತ್ತಿವೆ. ಅದರಲ್ಲೂ ಕೆಲವು ಕೆರೆಗಳಿಗೆ ಎರಡೆರೆಡರು ಬಾರಿ ನೀರು ತುಂಬಿದ್ದರ ಫಲವಾಗಿ ಜಲ ಸಮೃದ್ಧಿಯಾಗಿ ಮಾರ್ಪಟ್ಟಿವೆ. ಇದರಿಂದ ರೈತಪಿ ಜನ ಖುಷಿಯಾಗಿದ್ದಾರೆ. ಆದರೆ ಕೆರೆಯ ಮಣ್ಣನ್ನೇ ನಂಬಿದ್ದ ಕುಂಬಾರ ಸಮುದಾಯದವರು ಮಣ್ಣಿಗಾಗಿ ಬೇರೆ ಕಡೆಗೆ ಹೋಗಬೇಕಾಗಿದ್ದರಿಂದ ಸದ್ಯ ತೊಂದರೆಗೆ ಒಳಗಾಗಿದ್ದಾರೆ. ಆದರೂ ಜನರಿಗೆ ಒಳ್ಳೆಯದಾಗಿರುವುದರಿಂದ ವ್ಯಾಪಾರ ವೃದ್ಧಿಯಾಗಿ ನಮಗೂ ಒಳ್ಳೆಯದಾಗುತ್ತದೆ ಎನ್ನುವ ಸಮಾಧಾನವೂ ಅವರಲ್ಲಿ ಮನೆ ಮಾಡಿದೆ. ಅದೂ ಬೇಸಿಗೆ ಬಂದಿರುವುದರಿಂದ ಮಣ್ಣಿನ ಉತ್ಪನ್ನಗಳನ್ನು ಮಾರಾಟ ಮಾಡಿ ಒಂದಷ್ಟು ಆದಾಯವನ್ನು ಕಂಡುಕೊಂಡಿದ್ದಾರೆ.

ಮಾರಾಟ ಜೋರು:

ತಿಕೋಟಾ ಭಾಗದಲ್ಲಿ ಹಲವಾರು ಕುಂಬಾರ ಕಸುಬುದಾರಿಕೆಯ ಕುಟುಂಬಗಳು ಈಗಲೂ ನೆಲೆಸಿವೆ. ಶತಮಾನದಿಂದಲೂ ಹಲವಾರು ಕುಟುಂಬಗಳು ಪಾರಂಪರಿಕವಾಗಿ ಮಣ್ಣಿನ ಉತ್ಪನ್ನಗಳು ತಯಾರು ಮಾಡಿ ಜನರ ಅಗತ್ಯಗಳಿಗೆ ಒದಗಿಸುವ ಕಾಯಕದಲ್ಲಿ ನಿರತವಾಗಿವೆ. ಅದೂ ತಿಕೋಟಾ ಪ್ರಮುಖ ವ್ಯಾಪಾರಿ ಕೇಂದ್ರವೂ ಅಗಿರುವ ಕಾರಣಕ್ಕೆ ಸುತ್ತಲೂ 40ಕ್ಕೂ ಹೆಚ್ಚು ಹಳ್ಳಿಗಳ ಜನ ಇಲ್ಲಿಗೆ ವಹಿವಾಟಿಗೆ ಬರುತ್ತಾರೆ. ಇದರಿಂದ ಕುಂಬಾರಿಕೆ ವಸ್ತುಗಳ ಖರೀದಿಯೂ ಚೆನ್ನಾಗಿಯೇ ಅಗುತ್ತದೆ.

ಕೆರೆ ಅಂಗಳವೇ ಆಸರೆ:

ಕುಂಬಾರಿಕೆ ಕುಟುಂಬದವರು ವೃತ್ತಿಗೆ ಆಶ್ರಯಿಸಿದ್ದು ತಿಕೋಟಾ ಕೆರೆಯನ್ನೇ. ವಿಶಾಲವಾದ ಕೆರೆ ಸಹಜವಾಗಿ ಮಳೆಗಾಲದಲ್ಲಿ ತುಂಬಿ ಆನಂತರ ಚಳಿಗಾಲ ಮುಗಿದು ಬೇಸಿಗೆ ಬರುವ ಹೊತ್ತಿಗೆ ಖಾಲಿಯಾಗುವ ಹಂತಕ್ಕೆ ಬರುತ್ತಿತ್ತು. ಬೇಸಿಗೆಯಲ್ಲಿ ಮಣ್ಣಿನ ಉತ್ಪನ್ನಗಳನ್ನು ತಯಾರಿಸಿದರೆ ಬೇಗನೇ ಒಣಗುವ ಜತೆಗೆ ಜನತೆಗೂ ಖರೀದಿಸುವುದರಿಂದ ಹೆಚ್ಚು ತಯಾರಿಕೆಗೆ ಒತ್ತು ನೀಡುತ್ತಿದ್ದರು. ಅದರಲ್ಲೂ ತಿಕೋಟಾ ಕೆರೆ ಮಣ್ಣು ಹದವಾಗಿರುವುದರಿಂದ ಉತ್ಪನ್ನ ತಯಾರಿಕೆಗೆ ಹೇಳಿ ಮಾಡಿಸಿದಂತಿದೆ. ಇದನ್ನು ಹತ್ತಾರು ಕುಂಬಾರರ ಕುಟುಂಬಗಳು ಆಶ್ರಯಿಸಿದ್ದವು. ಈ ಬಾರಿ ಪರಿಸ್ಥಿತಿ ಕೊಂಚ ಭಿನ್ನವಾಗಿದೆ.

ಸಿದ್ಧ ವಸ್ತುಗಳತ್ತ ಚಿತ್ತ:

ಹಿಂದೆ ಬೇಸಿಗೆಯಲ್ಲಿ ಕೆರೆಗಳಿಗೆ ನೀರು ತುಂಬಿಸಿದ ಉದಾಹರಣೆಯಿಲ್ಲ. ಆದರೆ ತಿಕೋಟಾ ಭಾಗದವರೇ ಆದ ಎಂ.ಬಿ.ಪಾಟೀಲರು ಜಲಸಂಪನ್ಮೂಲ ಸಚಿವರಾದ ಫಲವಾಗಿ ಈ ಭಾಗದಲ್ಲಿ ನೀರಾವರಿ ಚಟುವಟಿಕೆ ಬಿರುಸುಕೊಂಡು ನಾಲೆಗಳು ಬಂದಿವೆ. ತಾವೇ ಹೋರಾಟ ಮಾಡಿ ನಂತರ ಸಚಿವರಾಗಿ ಕೆರೆಗೆ ನೀರು ತುಂಬಿಸಿ ತಮ್ಮ ಮಾತನ್ನು ಉಳಿಸಿಕೊಂಡಿದ್ದಾರೆ. ಇದರಿಂದ ನೀರು ಹರಿದ ಕಾರಣಕ್ಕೆ ಕುಂಬಾರರಿಗೆ ಮಣ್ಣು ಸಿಗುತ್ತಿಲ್ಲ. ಕೆರೆಯ ಒಳಕ್ಕೂ ಹೋಗಲು ಆಗುತ್ತಿಲ್ಲ. ಈ ಕಾರಣದಿಂದ ಕುಂಬಾರ ಕುಟುಂಬದವರು ಅನಿವಾರ‍್ಯವಾಗಿ ಬೇರೆ ಊರುಗಳಿಂದ ಸಿದ್ಧ ಮಣ್ಣಿನ ವಸ್ತುಗಳನ್ನೇ ಖರೀದಿ ಮಾಡಿ ಮಾರಾಟ ಮಾಡುತ್ತಿದ್ದಾರೆ. ಆದರೆ ಆದಾಯದಲ್ಲಿ ಇಳಿಮುಖ ಕಂಡಿದೆ.

____________________________________________________________________
ನಮಗೂ ನೆರವು ನೀಡಿ

ಸಚಿವರು ನೀರು ಹರಿಸಿ ಒಳ್ಳೆಯದನ್ನೇ ಮಾಡಿದ್ದಾರೆ. ನಾವು ಈ ಬಾರಿ ತೊಂದರೆಗೆ ಒಳಗಾಗಿದ್ದೇವೆ. ಬದುಕು ನಡೆಸಬೇಕು ಎನ್ನುವ ಕಾರಣಕ್ಕೆ ಮಡಿಕೆ ಸಹಿತ ಹಲವು ಮಣ್ಣಿನ ಉತ್ಪನ್ನ ತಂದು ಮಾರುತ್ತಿದ್ದೇವೆ. ಸರಕಾರವೂ ನಮ್ಮ ನೆರವಿಗೆ ಬರಬೇಕು ಎನ್ನುವುದು ತಿಕೋಟಾದ ಬಸಪ್ಪ ಕುಂಬಾರ, ಶಿವಲಿಂಗಪ್ಪ ಕುಂಬಾರ, ಚಿದಾನಂದ ಕುಂಬಾರ, ನಂದು ಕುಂಬಾರ, ಶಿವಪ್ಪ ಕುಂಬಾರ ಮನವಿ ಮಾಡಿದ್ದಾರೆ.

________________________________________________________________________________________

ಕಷ್ಟ ಯಾರಿಕೆ ಹೇಳುವುದು?

ಇಲ್ಲಿಯೇ ಸಿಗುವ ಕಚ್ಚಾ ಮಣ್ಣು ತಂದು ಮನೆಯವರೆಲ್ಲಾ ಒಟ್ಟುಗೂಡಿ ಮಡಿಕೆ, ಕುಡಿಕೆ ತಯಾರಿ ಮಾಡುತ್ತಿದ್ದೆವು. ದಿನಕ್ಕೆ ಸಾವಿರಾರು ರೂ. ವಹಿವಾಟು ನಡೆಯುತ್ತಿತ್ತು. ಈ ಬಾರಿ ಪರಿಸ್ಥಿತಿ ಬದಲಾಗಿದೆ. ಬೇಸಿಗೆಯಲ್ಲೂ ನೀರಿದೆ. ಇದರಿಂದ ಮಣ್ಣು ಸಿಗುತ್ತಿಲ್ಲ. ನಮ್ಮ ಕಷ್ಟ ಯಾರಿಕೆ ಹೇಳುವುದು?
-ಬಸಪ್ಪ ಕುಂಬಾರ, ವ್ಯಾಪಾರಸ್ಥ.

ಕೃಪೆ : ವಿಜಯ ಕರ್ನಾಟಕ