ಬೆಳ್ತಂಗಡಿ (ಕುಲಾಲ ವರ್ಲ್ಡ್ ಡಾಟ್ ಕಾಮ್): ತಾಲೂಕಿನ ಜನಸಾಮಾನ್ಯರ ಪಾಲಿಗೆ ಸಂಜೀವಿನಿಯಂತಿರುವ ಇಲ್ಲಿನ ಸಾರ್ವಜನಿಕ ಆಸ್ಪತ್ರೆಯ ಆವರಣದಲ್ಲಿ ಈಗ ಹೊಸದೊಂದು ಭರವಸೆಯ ಬೆಳಕು ಮೂಡಿದೆ. ಇದಕ್ಕೆ ಕಾರಣಕರ್ತರಾದವರು ಆಸ್ಪತ್ರೆಯ ಆಡಳಿತ ವೈದ್ಯಾಧಿಕಾರಿ ಹಾಗೂ ತಾಲೂಕು ಕುಲಾಲ ಸಂಘದ ಮಹಾ ಪೋಷಕರಾದ ಡಾ. ರಮೇಶ್ ಅವರು. ಕೇವಲ ವೈದ್ಯಕೀಯ ವೃತ್ತಿಯನ್ನಷ್ಟೇ ಮಾಡದೆ, ಮಾನವೀಯತೆಯನ್ನೇ ಮಂತ್ರವಾಗಿಸಿಕೊಂಡಿರುವ ಇವರು, ಕತ್ತಲಲ್ಲಿ ಕರಗುತ್ತಿದ್ದ ನೂರಾರು ಅಂಧರ ಪಾಲಿಗೆ ಇಂದು ಸಾಕ್ಷಾತ್ ಆಶಾಕಿರಣವಾಗಿದ್ದಾರೆ.
ಸರ್ಕಾರದ ಆಯುಷ್ಮಾನ್ ಭಾರತ್ ಯೋಜನೆ ಕೇವಲ ಕಾಗದದ ಮೇಲಿನ ಯೋಜನೆಯಾಗದೆ, ಪ್ರತಿಯೊಬ್ಬ ಬಡವನ ಮನೆಬಾಗಿಲಿಗೆ ತಲುಪಬೇಕೆಂಬ ಡಾ. ರಮೇಶ್ ಅವರ ಅದಮ್ಯ ಹಂಬಲ ಇಂದು ಸಾಕಾರಗೊಳ್ಳುತ್ತಿದೆ. ಪ್ರತಿ ಬುಧವಾರ ಈ ಆಸ್ಪತ್ರೆಯು ಒಂದು ಪವಿತ್ರ ದೇಗುಲದಂತೆ ಮಾರ್ಪಡುತ್ತದೆ. ಅಲ್ಲಿ ನಡೆಯುವ ಕಣ್ಣಿನ ಪೊರೆ ಶಸ್ತ್ರಚಿಕಿತ್ಸಾ ಶಿಬಿರಗಳು ಕಣ್ಣು ಕಳೆದುಕೊಂಡವರ ಬಾಳಲ್ಲಿ ಹೊಸ ವಸಂತವನ್ನೇ ತರುತ್ತಿವೆ. ವಾರಕ್ಕೆ ಹತ್ತಕ್ಕೂ ಹೆಚ್ಚು ಮಂದಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿ, ಪಟ್ಟಿಯನ್ನ ಬಿಚ್ಚಿದಾಗ ಕಾಣುವ ಆ ಮೊದಲ ಬೆಳಕಿನ ಕಿರಣಕ್ಕೆ ಮನಸಾರೆ ನಗುತ್ತಿದ್ದಾರೆ.
ಬಾಹ್ಯ ಜಗತ್ತಿನ ಖಾಸಗಿ ಆಸ್ಪತ್ರೆಗಳಲ್ಲಿ ಸಾವಿರಾರು ರೂಪಾಯಿ ಸುರಿದರೂ ದಕ್ಕದ ಈ ಗುಣಮಟ್ಟದ ಚಿಕಿತ್ಸೆಯನ್ನು, ಡಾ. ರಮೇಶ್ ನೇತೃತ್ವದ ತಂಡವು ಸರ್ಕಾರಿ ಆಸ್ಪತ್ರೆಯ ಮಿತಿಯಲ್ಲೇ ಅತ್ಯಂತ ದಕ್ಷತೆಯಿಂದ ಉಚಿತವಾಗಿ ನೀಡುತ್ತಿದೆ. ಅಂಧತ್ವದ ಕಡು ಕತ್ತಲಲ್ಲಿ ಮರುಗುತ್ತಿದ್ದ ಜೀವಗಳಿಗೆ ದೃಷ್ಟಿ ಭಾಗ್ಯ ಕರುಣಿಸಿ, ಅವರು ಮತ್ತೆ ತಮ್ಮ ದೈನಂದಿನ ಬದುಕನ್ನು ನೆಮ್ಮದಿಯಿಂದ ಸಾಗಿಸುವಂತೆ ಮಾಡುತ್ತಿರುವ ಇವರ ಸೇವೆ ನಿಜಕ್ಕೂ ಅನನ್ಯ. ವೈದ್ಯರೊಬ್ಬರು ಮನಸ್ಸು ಮಾಡಿದರೆ ಒಂದು ಸಮಾಜದ ಕಣ್ಣೀರನ್ನು ಹೇಗೆ ಒರೆಸಬಹುದು ಎಂಬುದಕ್ಕೆ ಡಾ. ರಮೇಶ್ ಅವರ ಈ ‘ದೃಷ್ಟಿ ಕ್ರಾಂತಿ’ಯೇ ಸಾಕ್ಷಿ. ಈ ಯೋಜನೆಯ ಸದುಪಯೋಗವನ್ನು ಪ್ರತಿಯೊಬ್ಬ ಅರ್ಹ ಫಲಾನುಭವಿಗಳು ಪಡೆದುಕೊಂಡು, ತಮ್ಮ ಬದುಕನ್ನು ಪ್ರಕಾಶಮಾನವಾಗಿಸಿಕೊಳ್ಳಬೇಕೆಂದು ಆಸ್ಪತ್ರೆಯ ಆಡಳಿತ ಮಂಡಳಿಯು ಪ್ರೀತಿಪೂರ್ವಕವಾಗಿ ವಿನಂತಿಸಿದೆ.
