ಬೆಳ್ತಂಗಡಿ(ಕುಲಾಲ ವರ್ಲ್ಡ್ ಡಾಟ್ ಕಾಮ್): ಕನಸುಗಳಿಗೆ ಶ್ರಮದ ಬಣ್ಣ ಹಚ್ಚಿದರೆ ಸಾಧನೆಯ ಶಿಖರ ಅದೆಷ್ಟು ಸುಂದರವಾಗಿ ಕಾಣುತ್ತದೆ ಎಂಬುದಕ್ಕೆ ಉಜಿರೆಯ ಎಸ್ಡಿಎಂ ಪದವಿಪೂರ್ವ ಕಾಲೇಜಿನ ವಿದ್ಯಾರ್ಥಿನಿ ನಿಜಾ ಕುಲಾಲ್ ಅವರೇ ಸಾಕ್ಷಿ. ಕೇವಲ ಅಂಕಗಳಿಗಾಗಿ ಓದದೆ, ತನ್ನ ಮೇಲಿದ್ದ ಆತ್ಮವಿಶ್ವಾಸವನ್ನೇ ನಂಬಿ ಮರು ಮೌಲ್ಯಮಾಪನಕ್ಕೆ ಮೊರೆಹೋದ ನಿಜಾ, ಇಂದು ಇಡೀ ರಾಜ್ಯವೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ.
ದ್ವಿತೀಯ ಪಿಯುಸಿ ಕಲಾ ವಿಭಾಗದ ವಿದ್ಯಾರ್ಥಿನಿ ನಿಜಾ ಕುಲಾಲ್ ಮೊದಲು 593 ಅಂಕಗಳನ್ನು ಪಡೆದಿದ್ದರು. ಮರು ಮೌಲ್ಯಮಾಪನದ ನಂತರ ಇಂಗ್ಲಿಷ್ ವಿಷಯದಲ್ಲಿ ಹೆಚ್ಚುವರಿ 3 ಅಂಕಗಳನ್ನು ಪಡೆಯುವ ಮೂಲಕ ಒಟ್ಟು 596 ಅಂಕಗಳೊಂದಿಗೆ ರಾಜ್ಯಮಟ್ಟದಲ್ಲಿ ದ್ವಿತೀಯ ಸ್ಥಾನಕ್ಕೇರಿದ್ದಾರೆ. ಇದು ಬರಿ ಅಂಕಗಳ ಏರಿಕೆಯಲ್ಲ, ಒಬ್ಬ ವಿದ್ಯಾರ್ಥಿನಿಯ ಸತತ ಪರಿಶ್ರಮಕ್ಕೆ ಸಿಕ್ಕ ನ್ಯಾಯ ಹಾಗೂ ಬೆವರು ಸುರಿಸಿದ ಪೋಷಕರ ಕನಸಿಗೆ ಸಂದ ಜಯ. ಮಗಳ ಈ ಅದ್ಭುತ ಸಾಧನೆ ಇಂದು ಆಕೆಯ ಮನೆತನಕ್ಕೆ ಮಾತ್ರವಲ್ಲದೆ, ಇಡೀ ಸಮುದಾಯಕ್ಕೆ ಹಾಗೂ ಎಸ್ಡಿಎಂ ಸಂಸ್ಥೆಗೆ ಹೆಮ್ಮೆಯ ಕಿರೀಟವನ್ನಿಟ್ಟಿದೆ.
ಮಗಳ ಯಶಸ್ಸಿನ ಹಿಂದೆ ತಂದೆ-ತಾಯಿಯ ಮಮತೆಯ ಪ್ರೋತ್ಸಾಹವಿದೆ, ಗುರುಗಳ ಅಕ್ಕರೆಯ ಮಾರ್ಗದರ್ಶನವಿದೆ. ಶೈಕ್ಷಣಿಕ ಗುಣಮಟ್ಟದಲ್ಲಿ ಎಂದಿಗೂ ರಾಜಿ ಮಾಡಿಕೊಳ್ಳದ ಎಸ್ಡಿಎಂ ಕಾಲೇಜಿನ ಹಿರಿಮೆಯನ್ನು ಈ ಸಾಧನೆ ಮತ್ತಷ್ಟು ಎತ್ತರಕ್ಕೇರಿಸಿದೆ. ಈ ಸಂಭ್ರಮದ ಸಂದರ್ಭದಲ್ಲಿ ಕಾಲೇಜಿನ ಆಡಳಿತ ಮಂಡಳಿ, ಪ್ರಾಂಶುಪಾಲರು ಹಾಗೂ ಸಿಬ್ಬಂದಿ ವರ್ಗವು ನಿಜಾ ಕುಲಾಲ್ ಅವರ ಭವಿಷ್ಯದ ಹಾದಿ ಇನ್ನೂ ಪ್ರಕಾಶಮಾನವಾಗಿರಲಿ ಎಂದು ಹಾರೈಸಿ, ಹೃತ್ಪೂರ್ವಕವಾಗಿ ಅಭಿನಂದಿಸಿದ್ದಾರೆ. ನಿಜಾಳ ಈ ಸಾಧನೆ ಹತ್ತಾರು ವಿದ್ಯಾರ್ಥಿಗಳಿಗೆ ಸ್ಫೂರ್ತಿಯ ಸೆಲೆಯಾಗಲಿ.
