ದೇಶ-ವಿದೇಶದ ಜನರ ಪ್ರಮುಖ ಸಂವಹನ ಕೊಂಡಿ ಮತ್ತು ಪ್ರಮುಖ ಮಾಧ್ಯಮವಾಗಿರುವ ಅಂತರ್ಜಾಲದ ಮೂಲಕ ಕುಲಾಲ/ಕುಂಬಾರ ಸಮುದಾಯದ ಜಗತ್ತಿನ ವಿವಿಧ ಮೂಲೆಗಳಿಂದ ಸಿಗುವ ಸುದ್ಧಿಗಳನ್ನು ಜೊತೆಗೆ ಲೇಖನಗಳನ್ನು ಸಮರ್ಪಕವಾಗಿ ತಲುಪಿಸಬೇಕೆಂಬ ಉದ್ದೇಶದೊಂದಿಗೆ `ಕುಲಾಲ್ ವರ್ಲ್ಡ್ ಡಾಟ್ ಕಾಮ್’ ಎಂಬ ತಾಣವನ್ನು ಸ್ಥಾಪಿಸಿರುವುದು ತಮಗೆಲ್ಲಾ ಗೊತ್ತೇ ಇದೆ. ಸಮುದಾಯದ ಜನಪ್ರಿಯ ಈ ಸುದ್ದಿ ತಾಣ ಸ್ಥಾಪನೆಯಾಗಿ ಐದು ವರ್ಷಗಳು ಕಳೆದಿವೆ. ನಮ್ಮ ಈ ಯಶಸ್ಸಿಗೆ ನಿರಂತರ ನಮ್ಮ ತಾಣಕ್ಕೆ ಭೇಟಿ ಕೊಟ್ಟು ಓದುವ ಓದುಗರ ಪ್ರೀತಿ ವಿಶ್ವಾಸವೇ ಕಾರಣ. ತಾವು ಓದುವುದರ ಜೊತೆಗೆ ಅಂತರ್ಜಾಲ ಬಳಸುವ ತಮ್ಮ ಮಿತ್ರರಿಗೂ ಈ ತಾಣ ಓದುವಂತೆ ಪ್ರೇರೇಪಿಸಿದ ನಮ್ಮ ಓದುಗರೇ ನಮ್ಮ ಯಶಸ್ಸಿನ ರೂವಾರಿಗಳು. ಬರೆಯಲು ವೇದಿಕೆ ಸಿಗದಿದ್ದ ಸಮುದಾಯದ ಮನಸ್ಸುಗಳಿಗೆ ಒಂದು ಸದಾವಕಾಶ ಒದಗಿಸಬೇಕು ಎಂಬ ಆಶಯವೂ ಈ ವೆಬ್ ಸೈಟ್ ನಿಂದ ನನಸಾಗಿದೆ.
ಸಮುದಾಯದ ನೂರಾರು ಪ್ರತಿಭಾವಂತರನ್ನು ಜಗತ್ತಿಗೆ ಪರಿಚಯಿಸಿದ, ಕಷ್ಟದದಲ್ಲಿದ್ದ ಕುಟುಂಬಗಳಿಗೆ ಸಾಧ್ಯವಾದಷ್ಟು ಆರ್ಥಿಕ ನೆರವು ನೀಡಿ ಸ್ಪಂದಿಸಿದ ತೃಪ್ತಿ ನಮಗಿದೆ. ವೆಬ್ ಸೈಟ್ ಆರಂಭದ ದಿನಗಳಲ್ಲಿ ನಿಮ್ಮ ಜೊತೆಗಿರುತ್ತೇವೆ ಎಂದು ಬೆಂಬಲಿಸಿದ ಕೆಲವರ ಹೆಸರನ್ನು ಮಹತ್ವಾಕಾಂಕ್ಷೆಯೊಂದಿಗೆ ನಮ್ಮ ಸಂಪಾದಕೀಯ ಬಳಗದಲ್ಲಿ ಗುರುತಿಸಿಕೊಂಡೆವು. ಆದರೆ ಅದ್ಯಾಕೋ ಕೆಲವರು ನಮ್ಮ ಜೊತೆ ಸಕ್ರಿಯವಾಗಿ ತೊಡಗಿಸಿಕೊಳ್ಳುವ ಮನಸ್ಸು ಮಾಡಲಿಲ್ಲ. ಸಮಾನಮನಸ್ಕರನ್ನು ಒಳಗೊಳ್ಳುವಂತೆ ಮಾಡುವ ಪ್ರಯತ್ನವನ್ನು ಇನ್ನೂ ಹೆಚ್ಚು ಮಾಡಲಾಗದೆ ಹೋದದ್ದಕ್ಕೆ ವಿಷಾದವಿದೆ. ಆದರೆ ಫೇಸ್ ಬುಕ್ ಮತ್ತು ವಾಟ್ಸಾಪ್ ನ ಹಲವು ಮಿತ್ರರು ಲೇಖನಗಳನ್ನು, ಸುದ್ದಿಗಳನ್ನು ಕಳುಹಿಸುವ ಮೂಲಕ ನಮ್ಮ ಈ ಯಶಸ್ಸಿನಲ್ಲಿ ಭಾಗಿಯಾಗಿದ್ದಾರೆ. ಈ ಎಲ್ಲಾ ಮಿತ್ರರಿಗೂ ನಾವು ಚಿರಋಣಿಗಳಾಗಿದ್ದೇವೆ. `ಕುಲಾಲ್ ವರ್ಲ್ಡ್ ಡಾಟ್ ಕಾಮ್’ ಆರನೇ ವರ್ಷಕ್ಕೆ ಪಾದಾರ್ಪಣೆ ಮಾಡುತ್ತಿರುವ ಈ ಸಂದರ್ಭದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಸಕ್ರಿಯರಾಗಿರುವ ಸಮುದಾಯದ ಯುವಕ-ಯುವತಿಯರನ್ನು ನಮ್ಮ ಸಂಪಾದಕೀಯ ಬಳಗದಲ್ಲಿ ಸೇರಿಸಿಕೊಂಡು ಇನ್ನಷ್ಟು ಯೋಜಿತ ರೀತಿಯಲ್ಲಿ ಮುನ್ನಡೆಸಬೇಕೆಂಬ ಇರಾದೆಯಿದೆ. ನಮ್ಮ ಜೊತೆ ಗುರುತಿಸಿಕೊಳ್ಳಲು ಬಯಸುವವರು ವಾಟ್ಸಾಪ್ ಸಂಖ್ಯೆ : 0097433037723 ಸಂಪರ್ಕಿಸಬೇಕಾಗಿ ವಿನಂತಿ. ವೆಬ್ ಸೈಟ್ ಆರನೇ ವಸಂತಕ್ಕೆ ಕಾಲಿಡುತ್ತಿರುವ ಸಂದರ್ಭ ಈ ಜಾಲತಾಣದ ಕುರಿತು ನಿಮ್ಮ ಸಲಹೆ, ಅನಿಸಿಕೆ, ಅಭಿಪ್ರಾಯವೇನು ಎಂಬುದನ್ನು ಚುಟುಕಾಗಿ ಬರೆದು ನಿಮ್ಮ ಭಾವಚಿತ್ರದೊಂದಿಗೆ
ಮೇಲಿನ ನಂಬರಿಗೆ ಕಳಿಸಿಕೊಡಿ.
