ಕುಂದಾಪುರ(ಡಿ.೧೨): ಕುಲಾಲ ಸಮಾಜ ಸುಧಾರಕ ಸಂಘ (ರಿ) ಕುಂದಾಪರ ಮತ್ತು ಕರಾವಳಿ ಕುಲಾಲ ಕುಂಬಾರರ ಯುವ ವೇದಿಕೆ ಬೈಂದೂರು ಮತ್ತು ಕುಂದಾಪುರ ವಿಧಾನಸಭಾ ಘಟಕಗಳ ನೇತೃತ್ವದಲ್ಲಿ ಕುಲಾಲ ಕ್ರೀಡೋತ್ಸವ-೨೦೧೬ ಬಿದ್ಕಲ್ ಕಟ್ಟೆಯ ಸರ್ಕಾರಿ ಪದವಿ ಪೂರ್ವ ಕಾಲೇಜು ಮೈದಾನದಲ್ಲಿ ಡಿ.೧೧ರಂದು ಯಶಸ್ವಿಯಾಗಿ ನಡೆಯಿತು.
ಸಭಾ ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ನಿರಂಜನ ಕುಲಾಲ ಅವರು ವಹಿಸಿದ್ದರು. ಕಾರ್ಯಕ್ರಮದ ಉದ್ಘಾಟನೆಗೈದ ಡಾ. ಎಮ್ ವಿ ಕುಲಾಲ್ ಮಾತನಾಡಿ, ಕ್ರೀಡೋತ್ಸದ ಮಹತ್ವವನ್ನು ತಿಳಿಸುತ್ತಾ ಸಮಾಜ ಬಾಂಧವರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಒಂದೆಡೆ ಸೇರಿಸುವ ಉದ್ದೇಶದಿಂದ ಈ ಕ್ರೀಡೋತ್ಸವವನ್ನು ಆಯೋಜಿಸಲಾಗಿದೆ. ಸಮಾಜದ ಎಲ್ಲ ವರ್ಗದ ಜನರಲ್ಲಿರುವ ಕ್ರೀಡಾ ಪ್ರತಿಭೆಯನ್ನು ಪ್ರದರ್ಶಿಸಲು ಕ್ರೀಡಾ ಸ್ಪರ್ಧೆಗಳು ಪೂರಕವಾಗಲಿದೆ. ಇಂತಹ ಸ್ಪರ್ಧೆಗಳಲ್ಲಿ ಮಕ್ಕಳನ್ನು ಹೆಚ್ಚಾಗಿ ಪಾಲ್ಗೊಳ್ಳುವಂತೆ ಮಾಡಬೇಕಾದುದು ಪಾಲಕರ ಕರ್ತವ್ಯವಾಗಿದೆ. ಸಮಾಜ ಬಾಂಧವರು ಕ್ರೀಡಾಸ್ಪೂರ್ತಿಯನ್ನು ಮೆರೆಯಬೇಕು ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಸುಪ್ರೀತ ಉದಯ ಕುಲಾಲ ಮತ್ತು ಉದಯ ಕುಲಾಲ, ಪ್ರಭಾಕರ್ ಕುಲಾಲ, ಕರುಣಾಕರ್ ಶೆಟ್ಟಿ, ಸತೀಶ್ ಕುಲಾಲ ನಡೂರು, ಹರೀಶ್ ಕುಲಾಲ ಕೆದೂರು , ಮಂಜುನಾಥ ಕುಲಾಲ ಉಪಸ್ಥಿತರಿದ್ದರು. ಮಹಿಳಾ ವಾಲಿಬಾಲ್ ನಲ್ಲಿ ಹುಣ್ಸೆಮಕ್ಕಿ ತಂಡ ಜಯಗಳಿಸಿದೆ. ಪುರುಷರ ವಾಲಿಬಾಲ್ ನಲ್ಲಿ ಬಿದ್ಕಲ್ ಕಟ್ಟೆ ತಂಡ ಜಯಗಳಿಸಿದ್ದು, ಕ್ರಿಕೆಟ್ ನ ಅಂತಿಮ ಪಂದ್ಯಾಟವನ್ನು ಸಮಯದ ಅಭಾವದಿಂದ ಮುಂದಿನ ಭಾನುವಾರಕ್ಕೆ ಮುಂದೂಡಲಾಗಿದ್ದು, ಅದೇ ಮೈದಾನದಲ್ಲಿ ಫೈನಲ್ ಪಂದ್ಯಾಟ ನಡೆಯಲಿದೆ.
