ಬೆಂಗಳೂರು(ಕುಲಾಲ ವರ್ಲ್ಡ್ ಡಾಟ್ ಕಾಮ್) : ಮೈಸೂರಿನ ಸಾಂಸ್ಕೃತಿಕ ಮಡಿಲಲ್ಲಿ ಅರಳಿದ ಮತ್ತೊಂದು ಹೆಮ್ಮೆಯ ಗರಿ ಇದು. ಕಾವ್ಯಶ್ರೀ ಚಾರಿಟೇಬಲ್ ಟ್ರಸ್ಟ್ ಹಾಗೂ ಮೈಸೂರು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಸಂಯುಕ್ತ ಆಶ್ರಯದಲ್ಲಿ ಇತ್ತೀಚೆಗೆ ಮೈಸೂರಿನ ಕನ್ನಡ ಭವನದಲ್ಲಿ ಹಮ್ಮಿಕೊಳ್ಳಲಾಗಿದ್ದ ‘ಕವಿ-ಕಾವ್ಯ ಸಂಭ್ರಮ ಮತ್ತು ರತ್ನ ಸನ್ಮಾನ’ ಸಮಾರಂಭವು ಒಂದು ಅರ್ಥಪೂರ್ಣ ಕ್ಷಣಕ್ಕೆ ಸಾಕ್ಷಿಯಾಯಿತು. ಈ ಅದ್ದೂರಿ ವೇದಿಕೆಯಲ್ಲಿ ಕುಂಬಾರ ಸಮುದಾಯದ ಆಶಾಕಿರಣ, ಪ್ರತಿಭಾವಂತ ಯುವ ಮುಖಂಡ ಡಾ. ಎಂ.ಪಿ. ವರ್ಷಾ ಅವರಿಗೆ ಪ್ರತಿಷ್ಠಿತ ‘ವಿಶ್ವ ಕೌಶಲ್ಯ ರತ್ನ’ ಪ್ರಶಸ್ತಿಯನ್ನು ಪ್ರದಾನ ಮಾಡಿ ಗೌರವಿಸಲಾಯಿತು.
ಡಾ. ಎಂ.ಪಿ. ವರ್ಷಾ ಅವರು ಕೇವಲ ಒಂದು ಸಮುದಾಯದ ಪ್ರತಿನಿಧಿಯಷ್ಟೇ ಅಲ್ಲದೆ, ನಾಡಿನ ಯುವಜನತೆಯ ಪಾಲಿನ ದಾರಿದೀಪವಾಗಿದ್ದಾರೆ. ಮೈಸೂರಿನ ಹೆಸರಾಂತ ‘ಕ್ರೆಡಿಟ್ (ಐ)’ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಯಾಗಿ (CEO) ಜವಾಬ್ದಾರಿ ನಿರ್ವಹಿಸುತ್ತಿರುವ ಇವರು, ಯುವ ಸಬಲೀಕರಣದ ನಿಟ್ಟಿನಲ್ಲಿ ಅದ್ಭುತ ಕೆಲಸ ಮಾಡುತ್ತಿದ್ದಾರೆ. ವಿಶೇಷವಾಗಿ ಯುವಪೀಳಿಗೆಯಲ್ಲಿ ಕೌಶಲ್ಯ ಅಭಿವೃದ್ಧಿ ಮೂಡಿಸುವುದು ಮತ್ತು ಉದ್ಯೋಗಾಧಾರಿತ ಶಿಕ್ಷಣದ ಮೂಲಕ ಅವರನ್ನು ಸ್ವಾವಲಂಬಿಗಳನ್ನಾಗಿ ಮಾಡುವಲ್ಲಿ ಇವರು ಒಬ್ಬ ಪರಿಣಿತ ಮಾರ್ಗದರ್ಶಕರಾಗಿ ಹಾಗೂ ಆಪ್ತ ಸಲಹೆಗಾರರಾಗಿ ಗುರುತಿಸಿಕೊಂಡಿದ್ದಾರೆ.
ಇವರ ಸಾಧನೆಯ ಹರವು ಕೇವಲ ಸ್ಥಳೀಯ ಮಟ್ಟಕ್ಕೆ ಸೀಮಿತವಾಗಿಲ್ಲ; ಬದಲಾಗಿ ಇವರು ಅಂತರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಕೀರ್ತಿ ಪತಾಕೆಯನ್ನು ಹಾರಿಸಿದ್ದಾರೆ. ರೋಟರಿ ESRAG ದಕ್ಷಿಣ ಏಷ್ಯಾ ಮೂಲಕ ಅಮೆರಿಕದ ಡಲ್ಲಾಸ್ನಲ್ಲಿ ನಡೆದ ಪ್ರತಿಷ್ಠಿತ ‘Earth X Expo’ ನಲ್ಲಿ ದಕ್ಷಿಣ ಏಷ್ಯಾದ ದೇಶಗಳ ಪ್ರತಿನಿಧಿಯಾಗಿ ಭಾಗವಹಿಸುವ ಮೂಲಕ ಜಾಗತಿಕ ವೇದಿಕೆಯಲ್ಲಿ ಗಮನ ಸೆಳೆದಿದ್ದಾರೆ. ಅಂತಹ ಅಪರೂಪದ ಸಾಧಕನಿಗೆ ಸಂದ ಈ ‘ವಿಶ್ವ ಕೌಶಲ್ಯ ರತ್ನ’ ಪ್ರಶಸ್ತಿಯು ಅವರ ನಿಸ್ವಾರ್ಥ ಸೇವೆ ಮತ್ತು ಕಾರ್ಯದಕ್ಷತೆಗೆ ಸಂದ ನಿಜವಾದ ಗೌರವವಾಗಿದೆ. ಈ ಗೌರವವು ಯುವ ಸಮುದಾಯಕ್ಕೆ ಹೊಸ ಸ್ಫೂರ್ತಿ ತುಂಬುವುದರಲ್ಲಿ ಸಂಶಯವಿಲ್ಲ.
