ಉಡುಪಿ: ತೀರಾ ಅಪರೂಪವಾಗುತ್ತಿರುವ ಕುಂಬಾರಿಕೆ ವೃತ್ತಿ ಮೇಲೆ ಕೊರೊನಾ ಕರಿನೆರಳು ಬೀರಿದೆ. ಕುಂಬಾರಿಕೆಯನ್ನೇ ನಂಬಿಕೊಂಡು ಜೀವನ ನಡೆಸುತ್ತಿರುವವರ ಪಾಡು ತೀರಾ ಹದಗೆಟ್ಟಿದೆ. ಒಪ್ಪೊತ್ತಿನ ಊಟಕ್ಕೂ ತತ್ವಾರ ಎದುರಾಗಿದೆ. ಬೇಸಿಗೆಯನ್ನೇ ನೆಚ್ಚಿಕೊಂಡು ವರ್ಷವಿಡೀ ತಯಾರಿಸುವ ಮಣ್ಣಿನ ಮಡಿಕೆ, ಗಡಿಗೆಗಳಿಗೆ ಕಿಲ್ಲರ್‌ ಕೊರೊನಾದಿಂದಾಗಿ ಮಾರ್ಕೆಟ್‌ ಇಲ್ಲದ ಕಾರಣ ಸಮಸ್ಯೆ ಎದುರಿಸುವಂತಾಗಿದೆ. ಪ್ರತಿ ವರ್ಷ ಬೇಸಿಗೆಯಲ್ಲಿ ಸಾಕಷ್ಟು ಸಂಖ್ಯೆಯ ಗಡಿಗೆ, ಮಡಿಕೆ ಸೇರಿ ಮಣ್ಣಿನ ವಸ್ತುಗಳನ್ನು ತಯಾರಿಸಿ ಮಾರಾಟ ಮಾಡುತ್ತಿದ್ದರು. ಆದರೆ ಈಗ ‘ಖರೀದಿಸುವವರೇ ಇಲ್ಲದ ಕಾರಣ’ ಕೈ ಕಟ್ಟಿ ಕುಳಿತುಕೊಳ್ಳುವಂತಾಗಿದೆ. ಕುಂಬಾರಿಕೆಯಿಂದ ಜೀವನ ರೂಪಿಸಿಕೊಂಡಿರುವ ಅಮಾಸೆಬೈಲು ಗ್ರಾಮದ ಮೇಲ್‌ಹೊಸಬಾರ್‌ ನಿವಾಸಿ ಕೃಷ್ಣ ಕುಲಾಲ್ ಇದಕ್ಕೆ ಪ್ರತ್ಯಕ್ಷ ಸಾಕ್ಷಿ.
ಕುಂಬಾರರ ಬದುಕು ಕಸಿದ ಕೊರೊನಾ
ದೇಶಾದ್ಯಂತ ಕೊರೊನಾ ಲಾಕ್‌ಡೌನ್‌ ಜಾರಿಯಾದಂದಿನಿಂದ ಮಣ್ಣಿನ ಪಾತ್ರೆಗಳ ಉತ್ಪಾದನೆ ನಿಂತಿದೆ. ಅಡುಗೆ ಮನೆ, ದೇವರ ಕೆಲಸ ಇತ್ಯಾದಿ ಉದ್ದೇಶದಿಂದ ನಾನಾ ನಮೂನೆಯ ಮಣ್ಣಿನ ಪರಿಕರ ತಯಾರಿಯಲ್ಲಿ ಇವರು ಸಿದ್ಧಹಸ್ತರು. ಕಳೆದ 40 ವರ್ಷಗಳಿಂದ ಈ ವೃತ್ತಿ ಮಾಡಿಕೊಂಡು ಸಂಸಾರದ ಹೊಣೆ ನಿಭಾಯಿಸಿಕೊಂಡು ಬಂದವರು. ಮಣ್ಣಿನ ಪಾತ್ರೆಗಳಿರುವ ಜಾಗದಲ್ಲೀಗ ಸ್ಟೀಲ್‌, ಅಲ್ಯೂಮಿನಿಯಂ ಇನ್ನಿತರ ಪರಿಕರ ಬಂದು ಕೂತಿದ್ದರೂ, ಗ್ರಾಮೀಣ ಭಾಗದಲ್ಲಿ ಮಣ್ಣಿನ ಪಾತ್ರೆ ಸಹಿತ ಇನ್ನಿತರ ಪರಿಕರ ಖರೀದಿ ಮಾಡುವವರಿದ್ದಾರೆ. ಅದರಲ್ಲೂ ಕೆಲವೊಂದು ಧಾರ್ಮಿಕ ಆಚರಣೆಗೆ ಮಣ್ಣಿನ ಪರಿಕರದ ಅಗತ್ಯವಿದೆ.
ಕಣ್ಮರೆಯಾಗುತ್ತಿದೆ ಮಣ್ಣಿನ ಮಡಕೆ
2-3 ದಶಕದ ಹಿಂದೆ ಮನೆ ಮನೆಗೆ ತಿರುಗಿ ಮಣ್ಣಿನ ಮಡಕೆ ಮಾರಾಟ ಮಾಡುವ ಪದ್ಧತಿ ಈಗ ಬಹುತೇಕ ವಿರಳ. ಪ್ರಸ್ತುತ ಸಂತೆ, ಜಾತ್ರೆಗಳಿಗೆ ಇವರು ಹೋಗುತ್ತಿದ್ದಾರೆ. ಇಂತಹುದೇ ನಮೂನೆಯ ಮಣ್ಣಿನ ಸಾಧನ ಬೇಕು ಎಂದು ತಿಳಿಸಿದರೆ ತಯಾರಿಸಿ ಮನೆಗೆ ತಲುಪಿಸುತ್ತಿದ್ದಾರೆ. ಮಣ್ಣಿನ ಮಡಕೆ ತಯಾರಿಗೆ ಬೇಕಾದ ಕೊಜೆ ಮಣ್ಣು ಬಹುದೂರದಿಂದ ತರಬೇಕು. ಬೇಸಿಗೆಯಲ್ಲಿ ಮಣ್ಣಿನ ಪರಿಕರ ತಯಾರಿಸಿ ಅದನ್ನು ಸುಟ್ಟು ಒಪ್ಪ ಓರಣ ಮಾಡುವುದೇ ದೊಡ್ಡ ಸವಾಲು.
ಕೊರೊನಾ ಕರಿನೆರಳು
ಕೊರೊನಾ ಲಾಕ್‌ಡೌನ್‌ ಜಾರಿಗೊಂಡಿದ್ದು ಕುಂಬಾರಿಕೆಗೆ ದೊಡ್ಡ ಪೆಟ್ಟು ನೀಡಿದೆ. ಖರೀದಿಯೂ ಇಲ್ಲದ, ಉತ್ಪಾದನೆಯೂ ಮಾಡಲಾಗದ ಪರಿಸ್ಥಿತಿ ಎದುರಾಗಿದೆ. ಸರಕಾರದ ಯಾವುದೇ ಸವಲತ್ತು ಸಿಗದೆ ಸ್ವಂತ ಪರಿಶ್ರಮದಿಂದ ಕುಂಬಾರಿಕೆ ರೂಪಿಸಿಕೊಂಡು ಅದನ್ನೇ ಇಂದಿಗೂ ಜೀವನೋಪಾಯಕ್ಕಾಗಿ ಕಸುಬನ್ನಾಗಿ ಮಾಡಿಕೊಂಡಿರುವ ಇವರ ಪರಿಸ್ಥಿತಿ ಈಗ ತೀರಾ ಹದಗೆಟ್ಟಿದೆ
ಕುಂಬಾರಿಕೆಯನ್ನೇ ನೆಚ್ಚಿಕೊಂಡಿರುವ ಕುಟುಂಬಗಳಿಗೆ ಸರಕಾರ ಸ್ಪಂದಿಸಬೇಕು
ಹಿರಿಯರು ಕುಂಬಾರಿಕೆಯನ್ನೇ ಮಾಡಿಕೊಂಡು ಬಂದವರು. ನಾನು ಈಗಲೂ ಅದನ್ನೇ ಮಾಡುತ್ತಿದ್ದೇನೆ. 40 ವರ್ಷಗಳಿಂದ ಈ ಕಸುಬು ಮಾಡಿಕೊಂಡಿದ್ದೇನೆ. ಬಡತನದ ನಡುವೆ ಹೇಗೋ ಜೀವನ ನಡೆಸಿಕೊಂಡು ಬಂದಿದ್ದೇನೆ. ಮಣ್ಣಿನ ಸಾಧನಗಳ ಜಾಗದಲ್ಲಿ ಅನ್ಯ ವಸ್ತುಗಳು ಬಂದಿರುವುದರಿಂದ ವಾರದ ಸಂತೆ, ಜಾತ್ರೆಯ ವ್ಯವಹಾರವೇ ನಮಗೆ ಆಧಾರ. ವಾರದಲ್ಲಿ 1ರಿಂದ 2 ಸಾವಿರ ಸಂಪಾದನೆ ಆಗುತ್ತಿತ್ತು. ಸಾಗಾಟ ವೆಚ್ಚ, ಕೊಜೆ ಮಣ್ಣು ಖರೀದಿಸಲು ಬೇಕಾಗುವ ಹಣ ಸಂದಾಯ ಆಗಿ ಉಳಿಯುವ ಒಂದಿಷ್ಟು ಹಣ ಜೀವನಕ್ಕೆ ಬಳಕೆ ಮಾಡುತ್ತಿದ್ದೇನೆ. ಲಾಕ್‌ಡೌನ್‌ ಜಾರಿಗೊಂಡ ಬಳಿಕ ಕುಂಬಾರಿಕೆ ಸ್ಥಗಿತಗೊಂಡಿದೆ. ಈಗಾಗಲೆ ಉತ್ಪಾದಿಸಿದ ಮಣ್ಣಿನ ಪರಿಕರಗಳು ಹಾಗೆಯೇ ಬಿದ್ದುಕೊಂಡಿವೆ. ವ್ಯವಹಾರ ಎಲ್ಲವೂ ಸ್ಥಗಿತಗೊಂಡಿದೆ. ಗ್ರಾಮೀಣ ಗುಡಿ ಕೈಗಾರಿಕೆಯಡಿ ಸಿಗುವ ಸೌಕರ್ಯ ನಮಗೆ ಸಿಗುತ್ತಿಲ್ಲ. ಸರಕಾರ ಕುಂಬಾರಿಕೆಯನ್ನೇ ನೆಚ್ಚಿಕೊಂಡಿರುವ ಕುಟುಂಬಗಳ ನೆರವಿಗೆ ಮುಂದೆ ಬರಬೇಕು.
-ಕೃಷ್ಣ ಕುಲಾಲ್, ಮಣ್ಣಿನ ವಿವಿಧ ಸಾಧನಗಳ ತಯಾರಕರು
ಜಾನ್‌ ಡಿಸೋಜ ಕುಂದಾಪುರ (ಸುದ್ದಿ ಕೃಪೆ: ವಿಜಯ ಕರ್ನಾಟಕ)
