ರಾಜ್ಯದಾದ್ಯಂತ ಕುಂಬಾರ ಕುಲ ತಿಲಕ ಸರ್ವಜ್ಞ ಜಯಂತಿ ಆಚರಣೆ (ಸಮಗ್ರ ಚಿತ್ರ-ಸುದ್ದಿ)

ಕವಿ ಸರ್ವಜ್ಞರ ಬಗ್ಗೆ ಸಂಶೋಧನೆಯಾಗಲಿ : ಬಸವ ಗುಂಡಯ್ಯ ಸ್ವಾಮೀಜಿ 

ತೆಲಸಂಗ: ಕವಿ ಸರ್ವಜ್ಞ ಜನರಿಗೆ ಸಾಮಾನ್ಯ ಭಾಷೆಯಲ್ಲಿ ತ್ರಿಪದಿಗಳನ್ನು ರಚಿಸುವ ಮೂಲಕ ಸಮಾಜದಲ್ಲಿನ ಮೂಢನಂಬಿಕೆ, ಜಾತಿ ಪದ್ಧತಿ, ಅಸ್ಪೃಶ್ಯತೆ ಸೇರಿದಂತೆ ಹಲವು ಅಂಕುಡೊಂಕುಗಳನ್ನು ತಿದ್ದಿದ ದೇಶದ ಮಹಾನ್‌ ಶಕ್ತಿ ಎಂದು ಕುಂಬಾರ ಗುರುಪೀಠದ ಶ್ರೀ ಬಸವ ಗುಂಡಯ್ಯ ಸ್ವಾಮೀಜಿ ಹೇಳಿದರು.
ಗ್ರಾಮದಲ್ಲಿ ಮಂಗಳವಾರ ಕವಿ ಸರ್ವಜ್ಞ ಜಯಂತಿ ನಿಮಿತ್ತ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ ಮಾತನಾಡಿದ ಅವರು, ಭರತ ದೇಶದಲ್ಲಿ ವೇದ, ಉಪನಿಷತ್‌ಗಳನ್ನು ಜನರಿಗೆ ತಿಳಿಯುವ ಭಾಷೆಯಲ್ಲಿ ತ್ರಿಪದಿ ವಚನಗಳ ಮೂಲಕ ತಿಳಿಸಿದ್ದಾರೆ. ಸರ್ವಜ್ಞರ ಬಗ್ಗೆ ಸಂಶೋಧನೆ ಆಗಬೇಕು. ಕುಂಬಾರ ಸಮುದಾಯ ಮುಖ್ಯ ವಾಹಿನಿಗೆ ಬರಬೇಕು ಎಂದು ಹೇಳಿದರು.
ಮಾಜಿ ಕಾಡಾ ಅಧ್ಯಕ್ಷ ಬಸವರಾಜ ಕುಂಬಾರ ಮಾತನಾಡಿ, ಆಡು ಮುಟ್ಟದ ಸೊಪ್ಪಿಲ್ಲ ಸರ್ವಜ್ಞ ಹೇಳದ ವಿಷಯವಿಲ್ಲ. ಅವರು ಶಿಕ್ಷ ಣ, ಕೃಷಿ, ಸ್ತ್ರೀಯರ ಮಹತ್ವವನ್ನು ತ್ರಿಪದಿಗಳಲ್ಲಿ ತಿಳಿಸಿದ್ದರು. ಕನ್ನಡ ಪದ ಪುಂಜದ ಪಿತಾಮಹರಾಗಿದ್ದವರು ಎಂದರು.
ಬಿ.ಜಿ.ನಾಗನೂರ, ರಾಮಣ್ಣ ಕುಂಬಾರ, ಸುಭಾಷ ಕುಂಬಾರ, ಶ್ರೀಶೈಲ ಬಳಗಾನೂರ, ಅಪ್ಪಾಸಿ ಕುಂಬಾರ, ಗುರುರಾಜ ಕುಂಬಾರ, ಸದಾನಂದ ಕುಂಬಾರ, ಕಾಶೀನಾಥ ಕುಂಬಾರ, ಸುರೇಶ ಕುಂಬಾರ, ಮಲ್ಲಣ್ಣ ಕುಂಬಾರ, ವಿಠಲ ಕುಂಬಾರ, ಕಿರಣ ಕುಂಬಾರ, ಗುರು ಕುಂಬಾರ, ಎಂ.ಎನ್‌.ಬಣೋಶಿ, ಚನಬಸು ಕುಂಬಾರ, ಕರೆಪ್ಪ ಕುಂಬಾರ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.

 ______________________________________

ನಮ್ಮ ಸಂಸ್ಕೃತಿ, ಮೂಲ ಉದ್ಯೋಗ ಮರೆಯದಿರಿ : ಸಂಸದ ಸುರೇಶ ಅಂಗಡಿ

ಬೆಳಗಾವಿ: ಸಮಾಜದ ಅಂಕು-ಡೊಂಕುಗಳನ್ನು ತಿದ್ದಿ, ನಾವೆಲ್ಲರೂ ನೆಮ್ಮದಿಯಿಂದ ಬಾಳಬೇಕು ಎಂದು ತಿಳಿಸಿಕೊಟ್ಟ ಮಹಾನ್‌ ಪುರುಷ ಸರ್ವಜ್ಞರ ಆದರ್ಶಗಳನ್ನು ಪಾಲಿಸಬೇಕು ಎಂದು ಸಂಸದ ಸುರೇಶ ಅಂಗಡಿ ಹೇಳಿದರು.
ನಗರದ ಕುಮಾರ ಗಂಧರ್ವ ಕಲಾಮಂದಿರದಲ್ಲಿ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯಿತಿ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಹಾಗೂ ಮಹಾನಗರ ಪಾಲಿಕೆ ಆಶ್ರಯದಲ್ಲಿ ಮಂಗಳವಾರ ಹಮ್ಮಿಕೊಂಡಿದ್ದ ಸರ್ವಜ್ಞ ಜಯಂತ್ಯುತ್ಸವ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.ಕಂಬಾರರು, ಕುಂಬಾರರು ಹಾಗೂ ಬಡಿಗೇರ ಸಮಾಜದವರು ತಮ್ಮ ಮೂಲ ಕಸುಬುಗಳನ್ನು ಮರೆತಿರುವುದರಿಂದ ಇಂದು ನಮ್ಮ ದೇಶಕ್ಕೆ ಹೊರ ದೇಶದಿಂದ ಯುದ್ಧ ಸಾಮಗ್ರಿ ಮತ್ತು ಇತರ ಕರಕುಶಲಗಳನ್ನು ಆಮದು ಮಾಡಿಕೊಳ್ಳುವ ಪರಿಸ್ಥಿತಿ ಒದಗಿ ಬಂದಿದೆ. ನಮ್ಮ ಸಂಸ್ಕೃತಿ ಮತ್ತು ಮೂಲ ಉದ್ಯೋಗ ಮುಂದುವರಿಸಿಕೊಂಡು ಹೋಗುವುದರಿಂದ ಮಾತ್ರ ಉತ್ತಮ ಜೀವನ ಸಾಧ್ಯ ಎಂದು ಕಿವಿಮಾತು ಹೇಳಿದರು.
ತತ್ವಶಾಸ್ತ್ರದ ನಿವೃತ್ತ ಪ್ರಾಧ್ಯಾಪಕ ಐ.ಎಸ್‌. ಕುಂಬಾರ ಮಾತನಾಡಿ, ಎಲ್ಲ ವಿಷಯಗಳನ್ನು ಬಲ್ಲವರು ಎಲ್ಲರ ಮನದಲ್ಲಿ ಇರುತ್ತಾರೆ. ಅದೇ ರೀತಿ ಸರ್ವಜ್ಞರು ಸರ್ವಕಾಲಕ್ಕೂ ಸಮಾನರು ಎಂದರು. ವೇದಿಕೆ ಕಾರ್ಯಕ್ರಮಕ್ಕೂ ಮುಂಚೆ ನಗರ ಅಶೋಕ ವೃತ್ತದಲ್ಲಿ ಸರ್ವಜ್ಞ ಜಯಂತಿ ಮೆರವಣಿಗೆಗೆ ಸಂಸದ ಸುರೇಶ ಅಂಗಡಿ ಚಾಲನೆ ನೀಡಿದರು.
ಕರ್ನಾಟಕ ಪ್ರದೇಶ ಕುಂಬಾರ ಸಂಘದ ಜಿಲ್ಲಾಧ್ಯಕ್ಷ ಬಿ.ಜಿ. ಕುಂಬಾರ, ದಲಿತ ಮುಖಂಡ ಮಲ್ಲೇಶ ಚೌಗಲೆ, ಈರಪ್ಪ ಕುಂಬಾರ, ಮೇಘಾ ಕುಂಬಾರ, ಶಿವಾನಂದ ಕುಂಬಾರ ಸೇರಿದಂತೆ ಇನ್ನಿತರ ಗಣ್ಯರು ಉಪಸ್ಥಿತರಿದ್ದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ಶ್ರೀಶೈಲ ಕರಿಶಂಕರಿ ಸ್ವಾಗತಿಸಿದರು. ನೆಹರು ಯುವ ಕೇಂದ್ರದ ನಿವೃತ್ತ ಅಧಿಕಾರಿ ಎಸ್‌.ಯು. ಜಮಾದಾರ ನಿರೂಪಿಸಿದರು.

______________________________________________________________________

ಸರ್ವಜ್ಞ ಸಾಮಾಜಿಕ ಕಾಯಿಲೆಯ ವೈದ್ಯ : ಕೆ.ಟಿ.ಪ್ರವೀಣ ಕುಮಾರ್