ಚಳಿತ ಪೊರ್ತು. ಸುಗ್ಗಿದ ಕಂಡೊಗು ನೀರ್ ಒಡ್ಡಾಯೆರೆ ತೋಡುಗು ಕಟ್ಟ ಕಟ್ಟ್ ದ್ಂಡ್. ಕಟ್ಟ ನಿಲಿಕೆ ನೀರ್. ಪೊರ್ತು ಕಂತ್ ದ್ ಕತ್ತಲೆ ಆಂಡ್. ಕಜಿಪುಗು ದಾಲ ಇಜ್ಜೀಂದ್ ಅಪ್ಪೆ ಪಂಡೆರ್. ಬಡತನದ ಕಾಲ. ಇನಿ ಕುಂಡೊರಿ ( ಈ ಪಕ್ಕಿನ್ “ಪುಂಡದೆ” “ಕುಂಡ ಕೋರಿ ” “ನೀರ್ ಕೋರಿ” ಇಂಚ ಮಾತಾ ಲೆಪ್ಪುವೆರ್) ಪತ್ತ್ ಗಂದ್ ಪಂಡ. ಅಮ್ಮೆರ್ ಮೂಜಿ ಬೇಟರಿದ ಮಲ್ಲ ಮಂಡೆದ ಲೈಟ್ ನ್ ಕೊನತೆರ್. ಅಯಿತ ಮಂಡೆನ್ ತಿರ್ಗಾದ್ ಗ್ಲಾಸ್ ನ್ ಕುಂಟುಡು ಒಚ್ಚಿಯೆರ್. ಬೇಟರಿ ಪೀಂಕಾದ್ ಕುಡ ಪಾಡ್ದ್ ಗಟ್ಟಿ ಮನ್ತೆರ್. ಪೊತ್ತಾನಗ ಬೊಲ್ಪು ಒಂತೆ ಕಮ್ಮಿ ತೋಜಿಂಡ್.”ಏರ್ಂಬೆ ಉಂದು ಲೈಟ್ ಪೊತ್ತಾದ್ ನೆ”ರಡ್ಡ್ ನೆರ್ಡೆಲಾ ತಿಕ್ಕ್ಂಡ್. ಅಪಗ ಊರುಗು ಕರಂಟ್ ಬತ್ತಿಯಿಜಿ. ಚಿಮಿನಿದ ಲ್ಯಾಂಪುದ ಬೊಲ್ಪುಡು ಬೀಡಿ ಕಟ್ಟುನ,ಒದುನ, ಬರೆಪುನ ಕಾಲ. ಅಂಬಿ ಅಡ್ತಿನ ನೆಲಟ್ ಕುಲ್ಲುದು ಬರೆನಗ ಓದುನಗ ನೆಲತ ಪುರಿ ಪೀಂಕನ್ಗ್ ತುಚ್ಚಿದ್ ಉಪದ್ರ ಕೊರೊಂದಿತ್ತ್ಂಡ್. ಮಲ್ಲ ಲೈಟ್ ನ್ ಅಮ್ಮೆರೆಗ್ ಗೊತ್ತಾವಂದಿಲೆಕ ಪೊತ್ತಾವೊಂದಿತ್ತ. ಬಾನೊಗು ಲೈಟ್ ಪಾಡುನವೊಂಜಿ ಕುಸಾಲ್.
******
ಎಂಚಾಂಡಲ ಅಮ್ಮೆರ್ನ ಲೈಟ್ ರಡಿ ಆಂಡ್. ಕುಂಡೋರಿ ಹಾಕುನ ಬೆತ್ತಲಾ ಪತೊಂಡೆರ್. ತಂಗೀಸದ ಚೀಲ ಎಂಕುಲು ಪತೊಂಡ. ಕಂಡದ ಪುನಿಟೆ ತೋಡುದ ಕಟ್ಟ ಪುನಿಟೆ ನಡತ. ತೋಡುಡು ಅಲ್ಪಲ್ಪ ಕಟ್ಟೊಲು ನೀರ್ ಎರ್ಕ್ ನ ಪೊರ್ತು. ಮಿತ್ತ ಕಟ್ಟೊರ್ದ್ ತಿರ್ತ ಕಟ್ಟೊ ಮುಟ್ಟ ಕುಂಡೋರಿ ಪತ್ತೊಂದು ಬರೊಂದಿತ್ತ. ಮಿತ್ತ ಕಟ್ಟೊದ ಕಂಬಲೊದ ಕಟ್ಟ ಪುನಿತಲ್ಪ ತೋಡುಗು ಜತ್ತ. ಸೊಂಟ ಮುಟ್ಟ ನೀರ್ .ಕೆಲವು ಜಾಗೆಡ್ ಎದೆ ಮುಟ್ಟ. ಒಂಜಿ ಮೈಟ್ ಚಳಿ .
ಕಂಡದ ಪುನಿತ ಗಡಿ ತೋಡುದ ಗುಂಡಿ ಗುರಿ ಪೂರಾ ಕಣ್ಣ್ ಮುಚ್ಚಿದ್ ಪೋಂಡಲಾ ಗೊತ್ತಾಪುನಾತ್ ಅನುಭವ. ಅಮ್ಮೆರ್ನ ಎಡತ ಕೈಟ್ ಲೈಟ್,ಬಲತ ಕೈಟ್ ರಡ್ಡ್ ಕೋಲು ಉದ್ದದ ತಲಕೆದ ಬೆತ್ತ. ಚೀಲ ಎಂಕ್ಲೆನ ಪುಗೆಲ್ಡ್. ತೋಡ ಬರಿಟ್ ಮುಂಡೇವುದ ಬಲ್ಲೆದ ಇಡೆಟ್ ಕುಂಡೋರಿಲು ಆಡೆಗೆ ನಿದ್ರೆ ತೂಂಕೊಂದುಪ್ಪುವ. ಲೈಟ್ ಪಾಡ್ದ್ ಒಂಜೇ ಪೆಟ್ಟ್. ಬಲ್ಲೆಡ್ದ್ ಮುಂಡೇವುದ ಮುಲ್ಲು ತಾಗಂದಿಲೆಕ ಪತ್ತ್ ದ್ ಚೀಲೊಗು ಪಾಡ್ಯ. ನೀರ್ಡ್ ಉಚ್ಚುಲೆನ ಪೋಡಿಗೆಲಾ ಉಪ್ಪುಂಡು. ಒಳ್ಳೆದ ಉಪದ್ರ ಜಾಸ್ತಿ. ಬೆತ್ತ ಲೈಟ್ ಉಪ್ಪುನವೊಂಜಿ ದೈರ್ಯ. ಆಂಡಲಾ ಕಣ್ಣ್ ಎಚ್ಚರೊಡು ಬೋಡು. ಕುಂಡೊರಿದೊಟ್ಟಿಗೆ ಮುಳಿಕೊರ್ಂಗು ತಿಕ್ಕ್ ನಲಾ ಉಂಡು. ನಿಲೆದಾಂತಿ ಜಾಗೆಲೆಡ್ ನೀಂದ್ ದ್ ಲಾ ಪೋವೊಡಾಪುಂಡು.
ಇಂಚ ಮೂಜಿ ನಾಲ್ ಕಟ್ಟ ಕಡತ್ ದ್ ತಿರ್ತ್ ಬತ್ತ್ ದಾನಗ ಚೀಲ ದಿನ್ನೊ ಆಪುಂಡು. ಇನಿಕ್ ಯಾವುಂದು ತೋಡು ಮಿತ್ತೇರ್ನಗ ಒಂರ್ಬ ಗಂಟೆ ರಾತ್ರೆ.
******
ಅಪಗ ರಾತ್ರೆ ತೋಡುದ ಬರಿಯೆ ಬೈಲ್ ಡ್ ಜನ ಸಂಚಾರ ಕಡಿಮೆ. ಇತ್ತೆ ತೋಡುಡು ನೀರ್ ಲಾ ಇಜ್ಜಿ,ಕಟ್ಟಲಾ ಇಜ್ಜಿ. ನೀರ್ ಇತ್ತ್ಂಡಲಾ ಕಾರ್ ಪಾಡುಲೆಕ ಇಜ್ಜಿ.ಕರಂಟ್ ದ ಬೊಲ್ಪುಗು ಲೈಟ್ ದ ಬೊಲ್ಪು ತೋಜುಜಿ. ಜನೊಕುಲು ರಾತ್ರೆ ಬೇಗ ಜೆಪ್ಪುನ ಅಭ್ಯಾಸಲಾ ಇಜ್ಜಿ. ತೋಡುದ ಬರಿಟ್ ತೋಟೊ ಆದ್ ಲೈಟ್ ಪಾಡ್ನಗ ನಾಯಿಲು ಅಯಿತ ಪಿರಾವುಡೇ ನರಮಾನಿಲು ಪಾರ್ ಬರ್ಪೆರ್. ನರಮಾನ್ಯ ಉಲಯಿದ ವಿಶ್ವಾಸ ಕಮ್ಮಿ ಆತ್ಂಡ್. ಆನಿ ಕತ್ತಲೆ ಲೈಟ್ ಪಾಡೊಂದು ತೋಡ ಬರಿಕ್ ಪಿದಾಡ್ ಂಡ ನಿರೆತಕುಲು “ಒ ಇನಿ ಕುಂಡೊರಿ ಕಜಿಪು”ಂದ್ ಕಜಿಪುದ ಆಸೆಡುಪ್ಪುವೆರ್. ಉಪ್ಪು ಪುಳಿ ಮುಂಚಿ ,ಕಜಿಪು ನಿರೆಟ್ ಅಂಚಿ ಇಂಚಿ ಪಟ್ಟುನ ಮನಸ್ ಲಾ ಇತ್ತೆದ ಕಾಲೊಡು ಮಾಯೊ ಆವೊಂದುಂಡು.
******
ಇಲ್ಲಡೆ ಕೊನತ್ ದ್ ಚೀಲ ದೊರಿತ. ಕುಂಡೋರಿ ಪತ್ತುನ ತಂಗೀಸ್ದ ಚೀಲಡ್ ಕುಂಡೊರಿ ಬೊಕ್ಕ ಮೀನ್ ಮಾತ್ರೆ ಕೊನೊದು ಬರ್ಪುನೆ. ಚೀಲ ನಿಲಿಕೆ ಆಂಡ ಇರ್ವ ಕುಂಡೊರಿ ತಿಕ್ಕ್ಂದ್ಂಡ್ಂದ್ ಅಃದಾಜಿ ಮನ್ಪೊಲಿ. ಕೆಲವು ಸರ್ತಿ ಒಂಜಿ ರಡ್ಡ್ ಕುಂಡೋರಿ ತಿಕ್ಕ್ ನಲಾ ಉಂಡು. ಆಂಡ ಬಂಜಿದ ಬಡವುಗು ಯಾವೊಂದಿತ್ತ್ಂಡ್. ಕುಂಡೋರಿ ಬಜೀ ಪೂತೆ,ದಿನ್ನೊ ಕಮ್ಮಿದ ಪಕ್ಕಿ. ಕೋರಿ ಮೂರುನ ಕ್ರಮೊಕುಲಾ ಕುಂಡೊರಿ ಮೂರುನೆಕ್ಲಾ ವ್ಯತ್ಯಾಸ ಉಂಡು. ಕೋರಿನ್ ಸುಯಿ ತೊಲ್ಲುದು ಕರುವಾದ್ ತಿಗಿತ್ ದ್ ತಜತ್ದ್ ಮಾಸ ಮನ್ಪುನ ಕ್ರಮ. ಆಂಡ ಕುಂಡೊರಿದ ಮಂಡೆದಲ್ಪ ಕತ್ತಿಡ್ ಒಂಜಿ ಎಲ್ಯ ಗೀರ್ ಪಾಡ್ದ್ ಸುಯಿ ಚೋಲಿನ್ ಒಟ್ಟುಗೆ ಅಂಗಿ ಜಾರಾಯಿಲೆಕ ಜಾರಾಯೆರೆ ಆಪುಂಡು. ಮೂಲು ತೊಲ್ಲುನ ಕರುವವುನ ರಗಳೆ ಇಜ್ಜಿ. ಅಯಿರ್ದ ಬೊಕ್ಕ ಮೂರ್ದ್ ಮಾಸ ಮನ್ಪುನೆ. ಕಜಿಪು ಕೋರಿದ ಕಜಿಪುದಲೆಕೊನೆ ಎಡ್ಡೆ ರುಚಿ. ದಿಂಜ ತಿಕಿನಾನಿ ನಿರೆಕರೆಟ್ ಪೂರಾ ರಡ್ಡ್ ಮೂಜಿ ದಿನ ಕುಂಡೋರಿದ ಕಜಿಪು.
******
ಆನಿದ ಬಡಪತ್ತ್ ದ ಕಾಲೊಡು ಕುಂಡೋರಿದ ಕಜಿಪು ನಮ್ಮ ನಾಲಾಯಿದ ರುಚಿನ್ ಬಂಜಿದ ಬಡವುನು ತಗ್ಗಾವೊಂದಿತ್ತ್ಂಡ್. ಮಲ್ಲಾಕುಲು ಕೋರಿ ಕಜಿಪು ತಿಂದ್ ದ್ ‘ಇನಿ ಕೋರಿ ಕಜಿಪುಂದು’ಪಂಡ್ದ್ ಗತ್ತ್ ಡ್ ಆರಿಗೆ ಬುಡ್ನಗ ಎಂಕುಲು ಕುಂಡೋರಿ ಕಜಿಪು ತಿಂದ್ ದ್ ‘ಇನಿ ಎಂಕ್ಲೆಗ್ ಲಾ ಕೋರಿ ಕಜಿಪು’ಂದು ಎಲ್ಯಡ್ ಪನೊಂದಿತ್ತ. ಇನಿ ಕಾಸ್ ದ ಬಲೊಟು ಬೋಡಾಯಿನೆನ್ ತಿನ್ಪುನ ನರಮಾನಿ ಒರಿಪಾದ್ ದಕ್ಕ್ಂಡಲಾ ಬೊಕ್ಕೊರ್ಯಗ್ ಕೊರಯೆ. ಆನಿ ಬಡವು ಇತ್ತ್ಂಡ್,ಕಾಸ್ ಇಜ್ಜಾಂಡ್. ಇನಿ ಕಾಸ್ ಉಂಡು,ಬಡವು ಇಜ್ಜಿ.
******
ಆನಿದ ಕುಂಡೋರಿದ ಚೀಲ ಕುಂಬಾದ್ ಪೋತುಂಡು. ಕುಂಡೋರಿ ಪತ್ತುನ ಬಡು, ಮಲ್ಲ ಮಂಡೆದ ಲೈಟ್ ಸ್ವಿಚ್ ಬಲ್ಬು ಪೋದು ಅಟ್ಟೊ ಸೇರ್ದ್ಂಡ್. ಕುಂಡೋರಿ ಪತ್ತ್ ದ್ ಪತ್ತೆರೆ ಕಲ್ಪಾದ್, ತಿನ್ಪಾದ್ ಎಂಕ್ಲೆನ ಬಂಜಿದ ಬಡವು ನಾಲಾಯಿದ ಆಸೆನ್ ತಗ್ಗಾಯಿನ ಅಮ್ಮೆರ್ ಲಾ ಇಜ್ಜೆರ್. ಇನಿ ಬೀಲ ಎಟ್ಟಾದ್ ಬಿರ್ಕ್ ನ ಮಡೆನ್ ತಿಂದೊಂದು ಜಾಲ್ ಡ್ ಕುಂಡೋರಿ ನಲಿತೊಂದುಂಡು. ಕೆಡ್ಡಸ ಬನ್ನಗ ದುಂಬುದ ನೆನಪಾಪುಂಡು.
