ಕುಲಕಸುಬು ಮಾಡುವವರು ದಡ್ಡರಲ್ಲ: ಡಾ.ಕುಂಬಾರ ವೀರಭದ್ರಪ್ಪ

ಹೊಸನಗರ: ಕುಂಬಾರರು ಹಾಗೂ ಇನ್ನಿತರ ಗುಡಿಕೈಗಾರಿಕೆ ನಡೆಸುವವರು ದಡ್ಡರು ಎಂಬ ಮನೋಭಾವನೆ ಸಮಾಜದಲ್ಲಿ ಬೇರೂರಿದೆ. ಆದರೆ, ಸುಮಾರು 5 ಸಾವಿರ ವರ್ಷಗಳ ಹಿಂದೆಯೇ ಕುಂಬಾರರು ಮಡಿಕೆ ತಯಾರಿಸುತ್ತಿದ್ದರು ಎನ್ನುವುದನ್ನು ಮರೆಯುವಂತಿಲ್ಲ ಎಂದು ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಡಾ.ಕುಂ.ವೀರಭದ್ರಪ್ಪ ಹೇಳಿದರು.

ತಾಲೂಕಿನ ಕೋಡೂರು ಸಮೀಪದ ಹೊಸಳ್ಳಿಯಲ್ಲಿ ತಾಲೂಕು ಕುಂಬಾರರ ಸಂಘ ಭಾನುವಾರ ಏರ್ಪಡಿಸಿದ್ದ ಸಾಮೂಹಿಕ ಸತ್ಯನಾರಾಯಣ ಪೂಜೆ ಮತ್ತು ವಾರ್ಷಿಕ ಮಹಾಸಭಾ ಕಾರ‍್ಯಕ್ರಮದಲ್ಲಿ ಅವರು ಮಾತನಾಡಿದರು.
ಹರಪ್ಪ, ಮೆಹೆಂಜೋದಾರೋ ನಾಗರಿಕತೆಗಳ ಕುರುಹು ದೊರೆತಿರುವುದು ಮಡಿಕೆಗಳ ಚೂರುಗಳಿಂದ. ಕುಂಬಾರ ಎಂಬ ಪದವನ್ನು ಬೈಗುಳವಾಗಿ ಉಪಯೋಗಿಸುವುದು ಸರಿಯಲ್ಲ. ಚಕ್ರ ಎನ್ನುವುದು ಕುಂಬಾರರ ಆವಿಷ್ಕಾರ. ಚಕ್ರ ಪೌರಾಣಿಕವಾಗಿ ವಿಷ್ಣುವಿನ ಸುದರ್ಶನ ಚಕ್ರವಾಯಿತು. ಆಧುನಿಕ ವಿಜ್ಞಾನದ ಹಲವು ಆವಿಷ್ಕಾರಗಳು ಈ ಚಕ್ರದ ಹಿನ್ನೆಲೆಯಲ್ಲೇ ಆಗಿರುವುದು ಗಮನಾರ್ಹ ಎಂದರು.

12ನೇ ಶತಮಾನದಲ್ಲಿ ಬಸವಣ್ಣ ಅವರು ಎಲ್ಲ ಸಮಾಜದವರನ್ನು ಒಗ್ಗೂಡಿಸಲು ಮುಂದಾದರು. ಆದರೆ, ಕುಂಬಾರರು ಇಂದಿಗೂ ಸಂಘಟಿತರಾಗಿಲ್ಲ. ದೇಶದಲ್ಲಿ ಶೋಷಿತ ವರ್ಗದಲ್ಲಿಯೇ ಇರುವುದು ವಿಷಾದನೀಯ. ಕುಂಬಾರರು ದೇಶದಲ್ಲಿ ಒಟ್ಟು 20 ಲಕ್ಷ ಜನಸಂಖ್ಯೆ ಹೊಂದಿದ್ದರೂ, ಅವರ ಪೈಕಿ ಸುಮಾರು 25 ಒಳಪಂಗಡಗಳಿದೆ. ಸರಕಾರ ಕುಂಬಾರರ ಏಳಿಗೆಗೆ ಸೂಕ್ತ ಕಾರ‍್ಯಕ್ರಮಗಳನ್ನು ಹಾಕಿಕೊಳ್ಳಬೇಕೆಂದು ಆಶಿಸಿದರು.

ಕಂದಾಯ ಸಚಿವ ಕಾಗೋಡು ತಿಮ್ಮಪ್ಪ ಮಾತನಾಡಿ, ತುಳಿತಕ್ಕೆ ಒಳಗಾದದ್ದನ್ನೇ ಹಳಿಯುತ್ತಾ ಕುಳಿತರೆ ಪ್ರಯೋಜನವಿಲ್ಲ. ಸವಾಲಾಗಿ ಸ್ವೀಕರಿಸುವ ಮೂಲಕ ಸಮಾಜದಲ್ಲಿ ಉನ್ನತ ಸ್ಥಾನ ಗಳಿಸಬೇಕು. ಪ್ರಗತಿಗೆ ವಿದ್ಯಾಭ್ಯಾಸ ಪ್ರಮುಖ ಪಾತ್ರ ವಹಿಸುತ್ತದೆ. ಪೂಜೆ, ಪ್ರಾರ್ಥನೆಗಳು ಮನಸ್ಸಿನ ನೆಮ್ಮದಿಗೆ ಬೇಕೇ ವಿನಃ, ಅದೇ ಅಂತಿಮವಲ್ಲ. ಪ್ರಯತ್ನ, ಕ್ರಿಯಾಶೀಲತೆ ಸಾಧನೆಗೆ ಅಡಿಗಲ್ಲಾಗಿವೆ ಎಂದರು.

ಶಾಸಕ ಕಿಮ್ಮನೆ ರತ್ನಾಕರ ಮಾತನಾಡಿ, ತುಳಿತಕ್ಕೆ ಒಳಗಾದವರನ್ನು ಮೇಲೆತ್ತುವ ಪ್ರಯತ್ನವಾಗಿ ಎಲ್ಲ ವರ್ಗದವರಿಗೂ ಮೀಸಲು ಅಗತ್ಯ. ಒಳಮೀಸಲು ನೀಡದೇ ಕೇವಲ ಮಹಿಳಾ ಮೀಸಲು ನೀಡಿದರೆ ಉಪಯೋಗವಾಗದು ಎಂದರು.

ಮಾಣಿಲದ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ತಾಲೂಕು ಕುಂಬಾರರ ಸಂಘದ ಅಧ್ಯಕ್ಷ ಸಳ್ಳಿ ಪುಟ್ಟಸ್ವಾಮಿ ಅಧ್ಯಕ್ಷತೆ ವಹಿಸಿದ್ದರು. ಜಿ.ಪಂ. ಸದಸ್ಯ ಕಲಗೋಡು ರತ್ನಾಕರ್‌, ಶ್ವೇತಾ ಬಂಡಿ, ತಾ.ಪಂ. ಅಧ್ಯಕ್ಷ ವಾಸಪ್ಪ, ಸದಸ್ಯರಾದ ಚಂದ್ರಮೌಳಿ, ಶಕುಂತಲಾ ರಾಮಚಂದ್ರ, ಗ್ರಾ.ಪಂ. ಅಧ್ಯಕ್ಷ ಕೆ.ವೈ.ಜಯಂತ, ಸುಮಿತ್ರಮ್ಮ, ಪ್ರಮುಖರಾದ ಬಂಡಿ ರಾಮಚಂದ್ರ, ಬಿ.ಜಿ.ನಾಗರಾಜ, ಎ.ವಿ.ಮಲ್ಲಿಕಾರ್ಜುನ, ಎನ್‌.ಆರ್‌.ದೇವಾನಂದ, ಕುಂಬಾರರ ಸಂಘದ ಪದಾಧಿಕಾರಿಗಳು ಹಾಜರಿದ್ದರು.

ಗೌಡರ ಮನೆ ರೊಟ್ಟಿ!

ಹಳೆ ಕಥೆಗಳನ್ನು ಹೇಳಿ ಪ್ರಯೋಜನವಿಲ್ಲ. ಬದಲಾವಣೆಯ ಕಾಲ ಬಂದಿದೆ. ನಾನೂ ಹಿಂದೆ ಗೌಡರ ಮನೆ ಹಿಂಭಾಗದ ಕಟ್ಟೆ ಮೇಲೆ ಕುಳಿತು ರೊಟ್ಟಿ ತಿಂದು ಸೆಗಣಿ ಸಾರಿಸಿ ಬರುತ್ತಿದ್ದೆ. ಈಗ ಗೌಡರು ನಮ್ಮ ಮನೆಗೆ ಬಂದು ಟೀ ಕುಡಿಯುತ್ತಾರೆ. ಬದಲಾವಣೆ ಆಗಲು ಎಷ್ಟೋ ವರ್ಷಗಳು ಬೇಕಾಗುತ್ತವೆ. ಆದರೆ, ಬದಲಾವಣೆ ಅತ್ಯಗತ್ಯ.

-ಕಾಗೋಡು ತಿಮ್ಮಪ್ಪ