ಟ್ರಾಕ್ಟರ್ ಗೆ ಲಾರಿ ಡಿಕ್ಕಿಯಾಗಿ ನಾಗು ಕುಲಾಲ್ ದಾರುಣ ಸಾವು

ಉಡುಪಿ : ಲಾರಿಯೊಂದು ಟ್ರಾಕ್ಟರ್ ಗೆ ಡಿಕ್ಕಿ ಹೊಡೆದ ಪರಿಣಾಮ ಟ್ರಾಕ್ಟರ್ ನಲ್ಲಿ ಕುಳಿತಿದ್ದ ವ್ಯಕ್ತಿ ಕೆಳಕ್ಕೆ ಬಿದ್ದು ಮೃತಪಟ್ಟಿರುವ ಘಟನೆ ಉಪ್ಪೂರು ಗ್ರಾಮದಲ್ಲಿ ಸಂಭವಿಸಿದೆ.
ನಾಗು ಕುಲಾಲ್ ಮೃತ ವ್ಯಕ್ತಿ. ಕುಂದಾಪುರ ತಾಲೂಕು ಜಪ್ತಿ ಗ್ರಾಮದ ಇಂಬಾಳಿ ನಿವಾಸಿ ಯೋಗೀಶ್ ತನ್ನ ಟ್ರಾಕ್ಟರ್ ನಲ್ಲಿ ಉಡುಪಿಗೆ ಹೊರಟಿದ್ದು, ನಾಗು ಕುಲಾಲ್ ಅದರ ಮಡ್ ಗಾರ್ಡ್ ನ ಮೇಲೆ ಕುಳಿತು ಪ್ರಯಾಣಿಸುತ್ತಿದ್ದರು. ಉಪ್ಪೂರು ಗ್ರಾಮದ ರಿಕ್ಷಾ ನಿಲ್ದಾಣದ ಬಳಿ ತಲುಪಿದಾಗ ಎದುರಿನಲ್ಲಿ ಬಸ್ ನಿಂತಿದ್ದರಿಂದ ಯೋಗೀಶ್ ಟ್ರಾಕ್ಟರ್ ನ್ನು ಬಲಕ್ಕೆ ತಿರುಗಿಸಿಕೊಂಡು ಮುಂದಕ್ಕೆ ಹೋಗುತ್ತಿದ್ದಾಗ ಹಿಂದಿನಿಂದ ವೇಗವಾಗಿ ಬಳಿಕ ಲಾರಿ ಅದಕ್ಕೆ ಡಿಕ್ಕಿ ಹೊಡೆದಿತ್ತು. ಪರಿಣಾಮ ಮಡ್ ಗಾರ್ಡ್ ಮೇಲೆ ಕುಳಿತಿದ್ದ ನಾಗು ಕುಲಾಲ್ ರಸ್ತೆಗೆ ಬಿದ್ದಿದ್ದು, ಟ್ರಾಕ್ಟರ್ ನ ಹಿಂಬದಿಯ ಚಕ್ರ ಅವರ ಎಡಭುಜದ ಮೇಲೆಯೇ ಚಲಿಸಿತ್ತು. ತೀವ್ರವಾಗಿ ಗಾಯಗೊಂಡಿದ್ದ ನಾಗು ಕುಲಾಲ್ ಮಣಿಪಾಲ ಕೆಎಂಸಿ ಆಸ್ಪತ್ರೆಯ ದಾರಿಮಧ್ಯೆ ಕೊನೆಯುಸಿರೆಳೆದಿದ್ದಾರೆ. ಈ ಬಗ್ಗೆ ಬ್ರಹ್ಮಾವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.