ಕಾರು ಡಿಕ್ಕಿಯಾಗಿ ಬಂಟಕಲ್ಲು ನಿವಾಸಿ ಕಿಟ್ಟು ಮೂಲ್ಯ ಮೃತ್ಯು

ಪಡುಬಿದ್ರಿ : ಸ್ಕೂಟಿಗೆ ಮಾರುತಿ ಕಾರೊಂದು ಡಿಕ್ಕಿ ಹೊಡೆದ ಪರಿಣಾಮ ನಾಗರ ಪಂಚಮಿ ಪ್ರಯುಕ್ತ ನಾಗಬನಕ್ಕೆ ಪೂಜೆ ಸಲ್ಲಿಸಿ ಹಿಂತಿರುಗುತ್ತಿದ್ದ ವ್ಯಕ್ತಿಯೊಬ್ಬರು ಮೃತಪಟ್ಟ ಘಟನೆ ನಿನ್ನೆ ಮಧ್ಯಾಹ್ನ ಎರ್ಮಾಳು ಸಮೀಪ ಸಂಭವಿಸಿದೆ.
ಮೃತ ದ್ವಿಚಕ್ರ ಸವಾರರನ್ನು ಬಂಟಕಲ್ಲು ನಿವಾಸಿ ಕಿಟ್ಟು ಮೂಲ್ಯ (73) ಎಂದು ಗುರುತಿಸಲಾಗಿದೆ. ಇವರು ನಾಗರ ಪಂಚಮಿ ಪ್ರಯುಕ್ತ ಉಚ್ಚಿಲಕ್ಕೆ ತೆರಳಿ ನಾಗಬನಕ್ಕೆ ಪೂಜೆ ಸಲ್ಲಿಸಿ ವಾಪಸಾಗುತ್ತಿದ್ದ ವೇಳೆ ರಾಷ್ಟ್ರೀಯ ಹೆದ್ದಾರಿಯ ಎರ್ಮಾಳು ಪೆಟ್ರೊಲ್ ಬಂಕ್ ಬಳಿ ದುರಂತ ಸಂಭವಿಸಿದೆ. ಉಡುಪಿ ಕಡೆಯಿಂದ ಮೂಲ್ಕಿಯತ್ತ ಹೋಗುತ್ತಿದ್ದ ಎರಡೂ ವಾಹನಗಳು ಚತುಷ್ಪಥ ರಸ್ತೆಯ ಬಲಭಾಗದಲ್ಲಿ ಸಂಚರಿಸುತ್ತಿದ್ದು ಈ ವೇಳೆ ಸ್ಕೂಟಿಯ ಹಿಂಬದಿಗೆ ಕಾರು ಡಿಕ್ಕಿಯಾಗಿದೆ. ಈ ವೇಳೆ ರಸ್ತೆಗೆ ಅಪ್ಪಳಿಸಿದ ಕಿಟ್ಟು ಮೂಲ್ಯ ಅವರ ತಲೆಗೆ ಗಂಭೀರ ಏಟು ತಗುಲಿ ಸಾವನ್ನಪ್ಪಿದ್ದಾರೆ.