ಗೊಬ್ಬಾವುನಾರ್ ಗೊಬ್ಬಾವೊಂದುಲ್ಲೆರ್..
ಗೊಂಬೆ ಗೊಬ್ಬಾವುನಾರ್ ಮಿತ್ತ್ ಕುಲ್ಲುದು ಗೊಬ್ಬಾವೊಂದುಲ್ಲೆರ್
ನಲಿಪುನ ಗೊಂಬೆಲು ನಮ ಮುಲ್ಪ ನಲಿಪುನೆನ್ ತೂವೊಂದುಲ್ಲೆರ್..
ವಾ ಗೊಂಬೆನ್ ಏತ್ ಸಮಯ ಗೊಬ್ಬವೊಡ ಅಡೆ ಮುಟ್ಟ ಗೊಬ್ಬವೆರ್
ನಲಿತ್ತುದು ಬಚ್ಚಿಂಡ್ ಪಂಡ ಮನಿಪಂದೆ ಕುಲ್ಯೆರೆ ಬುಡಾಯೆರ್..
ಅರೆನ ಕೈಟ್ ಉಂಡು ಗೊಂಬೆದ ಸೂತ್ರದ ನೂಲು ದಾರ
ಅರೆನ ತಾಳೋಗು ತಕ್ಕ ಥಕ ಥೈ ನಮ ಮೂಲು ಏರ..
ಅರೆನ ಕೈಟ್ ಮಾತ ಗೊಂಬೆಲುಲ ಒಂಜೇ ಲೆಕ್ಕದ ಮಲ್ಲ ಎಲ್ಯ ಬೇದ ಇಜ್ಜಿ
ಗೊಂಬೆಲು ಮಾತ್ರ ಯಾನ್ ಮಲ್ಲ ಈ ಎಲ್ಯ ಬೇದ ಬಾವ ಬುಡ್ಪಿನೇ ಇಜ್ಜಿ..
ಆರ್ ನೂಲು ಕಡ್ತೆರ್ ಡ ಮಲ್ಲ ಆವಡ್ ಎಲ್ಯ ಆವಡ್ ಪೋವೊಡು ಮಣ್ಣ್ ಗೆ
ಈ ಸತ್ಯೋನು ತೆರಿದ್ ಮಲ್ಲ ಎಲ್ಯ ಬೇದ ಬಾವ ಬುಡುಂಡ ಪೋವ ಸ್ವರ್ಗೋಗೆ..
ಮಾಮಿನ ಮಗಲ್
ಕಾರ್ಗೆಜ್ಡೆದ ದುನಿಪುಗು ಯಾನೊರ ತಿರ್ಗ್ ದ್ ತೂಯೆ
ಮಾಮಿನ ಮಗಲ್ ವೈಯಾರೊಡು ಬರ್ಪುನ ಪೊರ್ಲು ತೂಯೆ..
ನಡಕೆ ಹಂಸದ ಮೆಲ್ಲ ಮೆಲ್ಲ ದೀಯಲ್ ಉಡಲ ಉಲಾಯಿ
ಅಳೆಡೊಂಜಿ ಮೋಕದ ಭಿನ್ನಹ ಮಲ್ಪೆರೆ ಮಗುರೊಂದಿಜ್ಜಿ ಎನ್ನ ನಾಲಯಿ..
ಅಳೆನ ಉಡಲ್ದ ಉಲಾಯಿ ಏರ್ ಉಲ್ಲರಾ ಎಂಕ್ ತೆರಿದಿಜಿ
ಒಟ್ಟುಗು ನಡಪುನಗ ಅಳೆಡ ಕೇನುನೆಂಚ ಗೊತ್ತಾಪುಜಿ..
ಆಳ್ ಎನ್ನ ಕೈತಲ್ ಬನ್ನಗ ಮೈ ಇಡೀ ಝುಮ್ ಆಪುಂಡು
ಆ ಬಟ್ಟಲ್ ಕಣ್ಣ್ ಡು ವಾರೆ ತೂನಗ ಎನ್ನ ಮನಸ್ ಮರ್ಲಾಪುಂಡು..
ಮಾಮುನಡೆ ಪೊದು ದೂರು ಪನುವಲಾ ಪೋಡಿಗೆ ಆಪುಂಡು
ಪಂಡಲ್ ಡ ಸತ್ಯಲ ಎನ್ನ ಬೆರಿ ಮಾಮುನ ಕೈಟ್ ಪೊಡಿ ಆಪುಂಡು.
ಕಾಲೋಗು ತಕ್ಕ ಕೋಲ
ತರೆ ನೆಲ್ಕೆ ವಿಚಿತ್ರ ಆಯಿನ ಕುಜಲ್
ಕೆಬಿಟ್ಟ್ ಉಗ್ಗೆಲ್ ಗ್ ಜಪ್ಪುಡಾವುನಂಚಿನ ರಿಂಗ್.
ಮೋನೆಡ್ ಸೂ ಪತ್ತ್ ದ್ ಕರಿಂಚಿನ ಪಜಿರ್ದಲೆಕ್ಕ ಒಂತೆ ಗಡ್ಡ
ಕೆಕ್ಕಿಲ್ ಡು ನಾಯಿಕಟ್ಟುನಂಚಿನ ಸ್ಟೀಲ್ ದ ಸಂಕಲೆ.
ಪರ್ಕಟ್ ಬಣ್ಣ ಮಾಜಿನ ಒಂಜಿ ಇಡೀ ಕೈತ ಅಂಗಿ
ಕೈಟೊಂಜಿ ತಡ್ಪೆಲೆಕ್ಕಂತಿನ ಮೋಬೈಲ್.
ಕುಡ ಒಂಜಿ ಕೈಟ್ ಚೊಂಬುದ ಬಲೆ
ಸೊಂಟರ್ದ್ ತಿರ್ತ್ ಜಾರುನ ಕುರೆಪಟ್ಟ್ ಪ್ಯಾಂಟ್.
ಪಾದೊಗೊಂಜಿ ಪೊರ್ಲುದ ಶೂ ಪಾಡೊಂದು ತಿರ್ಗುನ ನಮ್ಮ ಜವನೆರೆನ ಇತ್ತೆದ ಸ್ಟೈಲ್..
ಕಾಲೋಗು ತಕ್ಕ ಕೋಲ ಪಂಡ ಉಂದುವೆ ಆದುಪ್ಪು..
ರಚನೆ : ಸಿ. ಎಸ್. ಕುಲಾಲ್, ಬಂಟ್ವಾಳ
