ವಿಚಿತ್ರ ಕರುಳ ರೋಗದಲ್ಲಿ ಹದಿನಾರರ ಬಡ ಬಾಲೆ: ಸಿಕ್ಕಿತೇ ನಿಮ್ಮಿಂದ ಇವಳಿಗೆ ಆರ್ಥಿಕ ಸಹಕಾರದ ಸೆಲೆ..!

ಮಂಗಳೂರು (ಅಗಸ್ಟ್.೧೪, ಕುಲಾಲ್ ವರ್ಲ್ಡ್ ಡಾಟ್ ಕಾಮ್): ಆಕೆ ಹದಿನಾರು ವರ್ಷದ ಪುಟ್ಟ ಬಾಲೆ, ಮನೆತುಂಬ ಪುಟಿದು ಕುಣಿದು ಸಂಭ್ರಮಿಸಬೇಕಿದ್ದ ಬಾಲೆಯ ಕೈಕಾಲುಗಳು ನಿತ್ರಾಣಗೊಂಡಿದೆ. ಶಾಲಾ ಮಿತ್ರರೊಂದಿಗೆ, ಸ್ನೇಹ ಬಳಗದೊಂದಿಗೆ ನಲಿದಾಡಬೇಕಿದ್ದ ಕಂದನ ಕಣ್ಣುಗಳಲ್ಲಿ ಆತ್ಮಸ್ಥೈರ್ಯವೇ ಸತ್ತು ಬಿದ್ದಿದೆ.. ಅಕ್ಷರದ ಅ..ಆ ಕಲಿಯಬೇಕಿದ್ದ, ಹೊಸ ಹೊಸ ವಿಷಯ ತಿಳಿಯಬೇಕಿದ್ದ ಪುಟ್ಟ ಹುಡುಗಿ ಆಸ್ಪತ್ರೆಯ ಬೆಡ್ ನಲ್ಲಿ ಜೀವಂತಿಕೆಯನ್ನೆ ಕಳೆದುಕೊಂಡು ಹೈರಾಣಾಗಿ ಮಲಗಿದ್ದಾಳೆ.. ವಿಚಿತ್ರ ಕರುಳ ಸಂಬಂಧಿ ಸಮಸ್ಯೆಯಿಂದ ನರಕಯಾತನೆ ಅನುಭವಿಸುತ್ತಿರುವ ಹರ್ಷಿತಾ ಎಂಬ ಹದಿನಾರರ ಬಾಲೆಯ ಕಣ್ಣೀರ ಕಥೆಯಿದು..ವ್ಯಥೆಯಿದು..!

ಹೌದು.. ಕುಂಬಳೆ ಗ್ರಾಮದ ಕಿದೂರು ಕುಂಟಂಗೇರಡ್ಕದ ತೀರಾ ಬಡ ಕುಟುಂಬ ಗಂಗಾಧರ ಕುಲಾಲ್ ಮತ್ತು ವಸಂತಿ ದಂಪತಿಗಳ ಕುವರಿ ಹರ್ಷಿತಾ ಕಳೆದ ಒಂಬತ್ತು ವರ್ಷಗಳಿಂದ ವಿಚಿತ್ರ ಕರುಳ ಸಂಬಂಧಿ ರೋಗದಿಂದ ಬಳಲುತ್ತಿರುವ ನತದೃಷ್ಟ ಹೆಣ್ಣು ಜೀವ. ನಲವತ್ತು ವರ್ಷ ಪ್ರಾಯದ ತಂದೆ ಗಂಗಾಧರ ಅವರು ಒಂದು ಸಾಧರಣ ಅಂಗಡಿಯಲ್ಲಿ ಸಾಮಾನು ತೂಕ ಮಾಡುವ ದಿನಗೂಲಿ ಕಾರ್ಮಿಕ. ಅದು ಅಸ್ತಮಾ ರೋಗ ಈ ತಂದೆಯನ್ನು ನಿರಂತರವಾಗಿ ಕಾಡುತಿದ್ದು ಇದರಿಂದಲೇ ಹೈರಾಣಾಗಿರುವ ಬಡಜೀವ. ತಾಯಿ ವಸಂತಿಯದ್ದು ಇನ್ನೊಂದು ಗೋಳು. ಹೃದಯದ ಶಸ್ತ್ರಚಿಕಿತ್ಸೆಗೆ ಒಳಪಟ್ಟು ಮನೆಯಲ್ಲೆ ಮಲಗಿರುವ ಅಮ್ಮ ಎಂಬ ನತದೃಷ್ಟೆ… ಬಡತನವೇ ಹಾಸಿಗೆ ಹೊದ್ದು ಮಲಗಿದಂತಿರುವ ಈ ದಂಪತಿಗಳ ಒಬ್ಬಳೇ ಮಗಳು ಹರ್ಷಿತಾನೂ ರೋಗಿಷ್ಟೇಯಾಗಿರುವುದು ವಿಧಿಯ ಕ್ರೂರತೆ ಅಲ್ಲದೇ ಇನ್ನೇನು ಹೇಳಿ..?

ಹರ್ಷಿತಾ ನಾಲ್ಕು ವರ್ಷಗಳ ಹಿಂದೆ ಕರುಳ ಶಸ್ತ್ರಚಿಕಿತ್ಸೆಗೆ ಒಮ್ಮೆ ಒಳಗಾಗಿದ್ದಳು. ಆದರೆ ಇದೀಗ ಪುನಃ ಶಸ್ತ್ರ ಚಿಕಿತ್ಸೆಗೆ ಒಳಪಡಬೇಕಾದ ತುರ್ತು ಅನಿವಾರ್ಯತೆಯಲ್ಲಿ ಮಂಗಳೂರಿನ ದೇರಳ ಕಟ್ಟೆ ಕೆ.ಎಸ್ ಹೆಗ್ಡೆ ಆಸ್ಪತ್ರೆಗೆ ದಾಖಲಾಗಿದ್ದಾಳೆ. ಅಂದಾಜು ಒಂದುವರೆ ಲಕ್ಷದಷ್ಟು ಖರ್ಚು ಚಿಕಿತ್ಸೆಗೆ ತಗುಲಬಹುದೆಂದು ವೈದ್ಯರು ಅಂದಾಜಿಸಿದ್ದಾರೆ. ಈಗಾಗಲೇ ಈ ಬಡ ದಂಪತಿಗಳು ಮಗಳ ಶಸ್ತ್ರಚಿಕಿತ್ಸೆಗೆ ಎರಡು ಬಾರಿ ಹಣ ಒಟ್ಟುಗೂಡಿಸಲು ಪ್ರಯತ್ನಿಸಿ ಅದು ಸಾಧ್ಯವಾಗದೇ ಶಸ್ತ್ರ ಚಿಕಿತ್ಸೆಯ ದಿನಾಂಕವನ್ನೇ ವೈದ್ಯರು ಮುಂದೂಡಿದ್ದು ಪರಿಸ್ಥಿಯ ಘೋರತೆಯನ್ನು ತೆರದಿಡುತ್ತದೆ.. ಇಂತಹ ಬಡಕುಟುಂಬ ಇದೀಗ ಸಹೃದಯರಾದ ತಮ್ಮ ಮುಂದೆ ಮಗಳ ಕರುಳ ರೋಗದ ಶಸ್ತ್ರ ಚಿಕಿತ್ಸೆಗೆ ಸಹಾಯ ಮಾಡುವಿರಾ ಎಂದು ಸೆರಗೊಡ್ಡಿ ಬೇಡುತ್ತಿದೆ..!

ಬಡತನದಲ್ಲೇ ಬಡತನ ಎಂಬಷ್ಟು ಸಂಕಷ್ಟದಲ್ಲಿರುವ ಈ ಕುಟುಂಬದ ಬಾಲಕಿಯ ಚಿಕಿತ್ಸೆಗೆ ಸಹಾಯದಾತರಾಗುವಿರಾ? ಈ ಸಮಾಜದಲ್ಲಿ ಅರಳಿ ಬಾಳಬೇಕಾದ ಕಂದಮ್ಮನ ಬಾಳಿಗೆ ನೆರವಾಗುವೀರಾ? ನೀವು ಕಿಂಚಿತ್ತುಕೊಡಿ..ಅದೇ ಈ ಕುಟುಂಬಕ್ಕೆ ದೊಡ್ಡ ಸಹಾಯ.. ಬಾಲೆಯ ಬಾಳಿಗೆ ಬೆಳಕಾಗುವ ಮನಸಿರುವವರು ದಯವಿಟ್ಟು ಸ್ಪಂದಿಸಿ..

Bank Details

Gangadhar
KERALA GRAMIN BANK
KUMBLA BRANCH
A/C NO-40517100013525
IFSC CODE-KLGB0040517
Contact:9746875910
9605556711

ಬರಹ: ಮಂಜುನಾಥ್ ಹಿಲಿಯಾಣ
ಚಿತ್ರ ಮಾಹಿತಿ: ಹೇಮಂತ್ ಕುಮಾರ್, ಕಿನ್ನಿಗೋಳಿ