ಸಿಂದಗಿ(ಜ.೦೪, ಕುಲಾಲ್ ವರ್ಲ್ಡ್ ನ್ಯೂಸ್) : ದಾರಿ ಕಾಣದೇ ಕಂಗಾಲಾಗಿರುವ ಬಡ ರೈತ ಕುಟುಂಬವೊಂದು ಜಮೀನಿನ ಮಧ್ಯಭಾಗದ ಗಿಡದ ಕೆಳಗೆ ಗಾಂಧೀಜಿ ಭಾವಚಿತ್ರದೊಂದಿಗೆ ಅಮರಣ ಉಪವಾಸ ಸತ್ಯಾಗ್ರಹ ಕೈಗೊಂಡಿದೆ.
ತಾಲೂಕಿನ ಚಾಂದಕವಠೆ ಗ್ರಾಮದ ಸರ್ವೇ ನಂಬರ್‌ 429 ರ ಜಮೀನಿನ ರೈತ ದೇವಿಂದ್ರಪ್ಪ ಸಾಯಬಣ್ಣ ಕುಂಬಾರ ತನ್ನ ಪತ್ನಿ ಶಾಂತಾಬಾಯಿ ಸೇರಿ ಇಬ್ಬರು ಮಕ್ಕಳೊಂದಿಗೆ ಜಮೀನು ದಾರಿಗಾಗಿ ಒತ್ತಾಯಿಸಿ ಫೆ.1ರಿಂದ ಅಮರಣ ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದಾರೆ. ವಿಪರ್ಯಾಸವೆಂದರೆ ಈ ಕುಟುಂಬ ಇದೇ ಬೇಡಿಕೆ ಇಟ್ಟುಕೊಂಡು ಕಂಡಕಂಡವರ ಅಂಗಾಲಾಚಿದೆ. ಆದರೂ ನ್ಯಾಯ ಸಿಕ್ಕಿಲ್ಲ.
ಏತನ್ಮಧ್ಯೆ ಐದಾರು ಲಕ್ಷ ಸಾಲ, ಮೂರು ಎಕರೆ ಕಬ್ಬು ನಾಟಿ ಮಾಡಿ, ಕಬ್ಬು ಸಾಗಿಸಲು ದಾರಿ ಕಾಣದ್ದಕ್ಕೆ ನೆಟ್ಟ ಜಮೀನಿನಲ್ಲಿಯೇ ಕಬ್ಬು ಸುಟ್ಟುಹಾಕಿ ಸಂಕಟ ಪಡುತ್ತಿರುವ ಈ ರೈತ ಕುಟುಂಬ, ಕಳೆದ ಎರಡು ದಿನಗಳಿಂದ ಉಪವಾಸ ಕೈಗೊಂಡಿದೆ. ಆದರೆ ಅವರ ಸಂಕಟ ಮಾತ್ರ ಯಾವ ಅಧಿಕಾರಿಗಳ ಕಿವಿಗೂ ಬೀಳದಿರುವುದು ದುರಂತ.
ಉಪವಾಸ ಕೈಗೊಂಡಿದೆ. ಆದರೆ ಅವರ ಸಂಕಟ ಮಾತ್ರ ಯಾವ ಅಧಿಕಾರಿಗಳ ಕಿವಿಗೂ ಬೀಳದಿರುವುದು ದುರಂತ.
ಕರಗದ ಮನ:
ಜಮೀನಿಗೆ ಕಳೆದ 5 ವರ್ಷದಿಂದಲೂ ನ್ಯಾಯ ಪಂಚಾಯತಿಗಾಗಿ ಅಲೆದು ರೈತ ದೇವಿಂದ್ರಪ್ಪ ಸುಸ್ತಾಗಿದ್ದಾನೆ. ಗ್ರಾಮದ ಹಿರಿಯರ ಮುಂದೆ ಈ ಕುರಿತು ಮನವಿ ಮಾಡಲಾಗಿದ್ದರೂ ಸಂಕಷ್ಟದಿಂದ ಹೊರಬಂದಿಲ್ಲ. ರಾಜ್ಯದ ಮುಖ್ಯಮಂತ್ರಿಯಿಂದ ಹಿಡಿದು ಕೆಳ ಹಂತದ ಅಧಿಕಾರಿಗಳವರೆಗೆ ಹಾಗೂ ಸಂಬಂಧಿಸಿದ ಪೊಲೀಸ್‌ ಠಾಣೆಗೆ ಸಮಸ್ಯೆ ಇತ್ಯರ್ಥ ಪಡಿಸಲು ಸಹಾಯ ಮಾಡುವಂತೆ ಕೇಳಿಕೊಂಡಿದೆ. ಆದರೆ ಯಾರೂ ನಮ್ಮ ನೆರವಿಗೆ ಬಂದಿಲ್ಲ ಎನ್ನುತ್ತಿದೆ ಈ ರೈತ ಕುಟುಂಬ.
——–
ಇದು ನಮ್ಮ ಪಿತ್ರಾರ್ಜಿತ ಆಸ್ತಿ. ಬಹಳ ದಿನಗಳಿಂದಲೂ ದಾರಿ ಸಮಸ್ಯೆಗಾಗಿಯೇ ಬೇರೊಬ್ಬರಿಗೆ ಹೊಲ ಉಳುಮೆಗೆ ಕೊಟ್ಟಿದ್ದೆವು. ಸದ್ಯ ನಮ್ಮ ಕುಟುಂಬದ ಆಧಾರವಾಗಿರುವ ಈ ಜಮೀನಿನಲ್ಲಿ ನೀರು ಮಾರಿ ಹೊಟ್ಟೆ ತುಂಬಿಸಿಕೊಳ್ಳಬೇಕಾಗಿದೆ. ನನ್ನ ಮೂವರು ಹೆಣ್ಣು ಮಕ್ಕಳ ಮದುವೆ ಹಾಗೂ ಕಬ್ಬು ಬೆಳೆಯಲು ಮಾಡಿರುವ ಸಾಲವನ್ನು ಭರಿಸಲು ಸಾಧ್ಯವಾಗದೇ ಕಣ್ಣೀರು ಹಾಕುತ್ತಿದ್ದರೂ ಸಮಸ್ಯೆಗೆ ಪರಿಹಾರ ಸಿಗುತ್ತಿಲ್ಲ.
-ದೇವಿಂದ್ರ ಕುಂಬಾರ, ಧರಣಿನಿರತ ರೈತ
——-
ರೈತನ ಸಮಸ್ಯೆಗೆ ಅಧಿಕಾರಿಗಳು ಸ್ಪಂದಿಸದಿರುವುದು ಅರ್ಥವಾಗುತ್ತಿಲ್ಲ. ಕೂಡಲೇ ದಾರಿ ಸಮಸ್ಯೆ ಪರಿಹರಿಸುವ ಮಾನವೀಯತೆಯನ್ನು ಅಧಿಕಾರಿಗಳು ತೋರಿಸಬೇಕು.
– ರಾಘವ್‌ ಕುಂಬಾರ, ಸಮಾಜದ ಪ್ರಮುಖ
———
ಇವರ ಹೊಲಕ್ಕೆ ದಾರಿ ಹುಡುಕೋರು ಯಾರೂ ಇಲ್ದಂಗ್‌ ಆಗ್ಯಾದ. ಊರಾಗ ನ್ಯಾಯ ಪಂಚಾಯಿತಿ ಮಾಡಿ ಎಲ್ಲರೂ ಕೈ ತೊಳಕೊಂಡಾರ, ಸಕ್ರಿ ಫ್ಯಾಕ್ಟರಿ ಒಳಗ ಕೆಲಸ ಮಾಡುತ್ತಿರುವ ದೊಡ್ಡ ಮಗನೇ ಅವರ ಕುಟುಂಬದ ಆಧಾರವಾಗಿದ್ದಾನೆ. ದಾರಿ ಇಲ್ಲದಕ್ಕ ಇವರು ಏನೂ ಬಿತ್ತುವಂಗಿಲ್ಲ.. ಏನೂ ಉಣ್ಣುವಂಗಿಲ್ಲ. ಮೈಮ್ಯಾಲಿನ ಸಾಲ ತೀರಸಾಕ ಆಗ್ಲಿಕತ್ತಿಲ್ಲ.
-ಶಂಕರ ಪೂಜಾರಿ, ನೆರೆ ಹೊಲದ ರೈತ
——-
ಈಗಾಗಲೇ ನನಗೆ ಅಧಿಕಾರಿಗಳಿಂದ ವಿಷಯ ತಿಳಿದುಬಂದಿದೆ. ಸಂಬಂಧಿಸಿದ ಅಧಿಕಾರಿಗಳೊಂದಿಗೆ ಕುಟುಂಬವನ್ನು ಭೇಟಿ ಮಾಡುವೆ. ಕಾನೂನು ರೀತಿ ಕ್ರಮ ಕೈಗೊಂಡು ಸಮಸ್ಯೆ ಇತ್ಯರ್ಥಪಡಿಸುವೆ.
-ಅರುಣಕುಮಾರ ಕುಲಕರ್ಣಿ, ತಹಸೀಲ್ದಾರ್‌ ಸಿಂದಗಿ
