ಮಂಗಳೂರು(ಅ.೧೬, ಕುಲಾಲ್ ವರ್ಲ್ಡ್ ವಿಶೇಷ): ನಿರ್ನಾಲ ಕರಿದ್ ಬೊಂತೆಲ್ ತಿಂಗೊಲ್ಡು ನಮ್ಮ ತುಳುನಾಡ್ಡ್ ತುಡರಪರ್ಬದ ಸಂಬುರ್ಮೊ,ಬೆಡಿತ ಸ್ವರೊ ಕೇನ್ಂಡನೇ ಎಲ್ಯ ಜೋಕ್ಲೆಗ್ ಬಾರೀ ಸಂತೋಸ, ತುಡರಪರ್ಬ ತುಳುನಾಡ್ದ ಪೆರ್ಮೆದ ಪರ್ಬ ಪಂಡ ತಪ್ಪಾವಂದ್.
ರಾತ್ರೆಆಂಡ ಇಲ್ಲಸುತ್ತ ತಿಬಿಲೆಪೊತ್ತಾವುನ ಈ ಪರ್ಬದ ಪೊರ್ಲು ಪೊಲಿಕೆದ ಐಸಿರ ಎಂಚನೋ ,ಬೇಡಿಪುಡತ್ತ್ಂಡ ಪರ್ಬದ ಪೆರ್ಮೆ ಬೊಕಲಾತ್ ಎಚ್ಚಾಪುಂಡು. ಬೆಡಿ ಪನ್ನಗ ನಮಕ್ ಒಂಜಿ ಹಿರಿಯರೆನ ನೆನೆಪಾಪುಂಡು ಆರ್ ಬೊಕ ಏರ್ಲ ಅತ್ತ್ ನಮ್ಮ ತುಳುನಾಡ್ದ ಮಟ್ಟೆಲ್ಡ್ ಕುಲಾಯಿ ಸುರತ್ಕಲ್ ಪಸಂತ್ರೊಡು(ಪರಿಸರೊಡು)ಪುಗರ್ತೆ ಪಡಿಯಿನ ಬೂಬಣ್ಣೆ. ಆರ್ ಮಲ್ದಿನ ಬೆಡಿಕಿತ್ತಿನಾತ್ ಬಿಲೆ ಬೇತೆ ಓವ್ವೇ ಬೆಡಿಕ್ ಇಜ್ಜಿ. ಕುಲಾಯಿ ಸುರತ್ಕಲ್ ದ ಅರ್ನ ಬೆಡಿತ ಸಬ್ದ ನಾಲೂರುಗುಲಾ ಕೇನೊಂದಿತ್ತ್ಂಡ್ . ಕುಲಾಯಿಡ್ ಒಂಜಿ ಬೆಡಿ ಪುಡಯೆರೆ ಇಜ್ಜಿ ಬೂಬಣ್ಣನ ಬೆಡಿ ಪುಡಾಂಡ್ಂದ್ ಪನ್ಪೆದೆರ್. ಕುಲಾಯಿ ಬುಡ್ದ್ ಬೇತೆ ಊರುದಕ್ಲೆಗ್ ಅರೆನ ಪೊಲಬಿತ್ತಿಜಿಂಡಲಾ ಅರೆನ ಬೆಡಿತ ಪೊಲಬಿತ್ತ್ಂಡ್!
ಮುತ್ತಯ್ಯ ಮೂಲ್ಯ ಬೊಕ ದೇಯಿ ಮೂಲ್ಯೆದಿನ ಮೊಕೆದ ಮಗೆ ಬೂಬ ಮೂಲ್ಯೆರ್ ಯಾನೇ ಬೂಬಣ್ಣೆ. ಊರುಡು ಎಡ್ಡೆ ಪುಗರ್ತೆ ಪಡೆಯಿನಾರ್ ಸಾದು ಸಜ್ಜನೆ ನರಮಾನಿ. ಉಡಲ್ ನಿಲಿಕೆ ಪಿರ್ತಿದಿಂಜಿದಿ ಅರೆಗ್ ಪಜ್ಜೆ ಪಜ್ಜೆಡ್ಲಾ ಬೆರಿ ಸಗಾಯ ಆದ ಬತ್ತಿನಾರ್ ಅರೆನ ಬುಡೆದಿ ಸುಂದರಿ ಮೂಲ್ಯೆರ್.
ಸಂಸಾರ ಜೂವನಪನ್ನಗ ಬಂಜಿದ ಬಡವುಗ್ ಬೆನಿಯೆರೆ ಒಂಜಿ ಕಸುಬು ಬೋಡತ್ತೆ..? ಅಂಚ ಬೂಬಣ್ಣೆ ಅರೆನ ತಮ್ಮಲೆ ಕಟೀಲ್ ಬಾಬು ಮೂಲ್ಯೆರೆನ ಕೈತಲ್ ಒಲಿ ಪಟಾಕಿ ಮನ್ಪುನ ಕಸುಬುನ್ ಕಲ್ತೊಂಡೆರ್ .ಒಂಜಿ ಬೊಡಾಯಿ ಆಲ್ತದ ಒಲಿತ ಉಲಾಯಿ ಒಂಜಿ ಚಿಮ್ಟಿ ಮರ್ದ್ ದೀದ್ ಅಯಿಕೊಂಜಿ ಭತ್ತಿ ದೀದ್ ಬಾರೀ ಜಾಗ್ರತೆಡ್ ಮಡಿತ್ದ್ ಮನ್ಪುನ ಒಲಿ ಪಟಾಕಿ ಪಂಡ ಆತ್ ಸುಲಬದ ಬೇಲೆ ಅತ್ತ್! ಬೇಲೆ ದ ಮಿತ್ತ್ ದ ಭಕ್ತಿ , ಉಂತಾಂದಿ ಪೊರುಂಬಾಟದ ಪಲವಾದ್ ಪುದರ್ ಪೊಯಿನ ಒಲಿಪಟಾಕಿ, ಬೆಡಿ ಅರೆನ ಕೈಟ್ ಉದಿತೊಂದಿತ್ತ್ಂಡ್. ಇತ್ತೆದ ಕಾಲೊಡು ಬೆಡಿ ಮರ್ದ್ ಪುಡತ್ಂಡ ಬೊಕ್ಕ ಒರಿಪುನಿ ಒಂಜಾತ್ ಮಣ್ಣ್ ಡ್ ಕರವಂದಿ ಕಜವು, ಆಂಡ ಬೂಬಣ್ಣನ ಬೆಡಿ ಪುಡಾಂಡ ಬೊಕ್ಕ ಒರಿಪುನಿ ಒಂಜಿ ತುಂಡು ಒಲಿಮಡಲ್ ,ನಾಲ್ ತುಂಡು ಬಕ್ಕ್. ನೆರ್ದ್ ಮಣ್ಣ್ ಗ್ ದಾಲ ತೊಂದರೆ ಇಜ್ಜಿ. ಅಂಚಿತ್ತಿ ಒಲಿ ಪಟಾಕಿಗ್ ಆನಿರ್ದ್ ಇನಿಮುಟ್ಟಲಾ ಬೇರವುಂಡು. ದೂರ ದೂರದ ಊರುದಕುಲು ಬತ್ತ್ ದ್ ಕೊನೊವೊಂದುಲ್ಲೆರ್.
ಬೂಬ ಮೂಲ್ಯೆರೆನ ದಿಂಜಿದಿ ಸಂಸಾರ .ಅಕ್ಲೆಗ್ ಆಜಿ ಜೋಕುಲು. ಐಟ್ ರಡ್ಡ್ ಆಣ್- ನಾಲ್ ಪೊಣ್ಣುಲು ,ಕಡೀರ ಮಗಲ್ ಸುಜಾತ ಮೂಲ್ಯ ,ಬೊಕ್ಕದಕುಲು ಸೀತ ಮೂಲ್ಯ, ಗಂಗಾದರ ಮೂಲ್ಯ, ಶಕುಂತಲ ಮೂಲ್ಯ ,ಯಾದವ ಮೂಲ್ಯ ಅಕೇರಿದಾರ್ ಯಶೋದ ಮೂಲ್ಯ. ಬೂಬಣ್ಣೆ ಒಲಿಪಟಾಕಿದ ಕಜ್ಜೊನ್ ಮಂತೊಂದು ದಿಂಜಿದಿ ಸಂಸಾರೊಡು ಸಂತೊಸ ತೂಯಿನಾರ್.
1994 ಇಸವಿದ ಅಕ್ಟೊಬರ್ 11 ತಾರೀಕ್ ಗ್ ಬೂಬಣ್ಣೆ ಕಾಯ ಬುಡ್ದ್ ದೇವೆರೆ ಪಾದ ಸೇರ್ಯೆರ್. ಅರೆನ ಕಾಲ ಸಂದಿ ಬೊಕ್ಕ ಇತ್ತೆ ಅರೆನ ಜೊಕುಲು ಗಂಗಾಧರ್ ಬೊಕ್ಕ ಯಾದವೆರ್ ತನ್ ಕ್ಲೆನ ಅಮ್ಮೆರ್ ಕಲ್ಪಾದಿ ಕಜ್ಜೊನು ದುಂಬೊರಿತ್ ಪೊವೊಂದುಲ್ಲೆರ್. ಇತ್ತೆ ಮೊಕುಲು ಮನ್ಪುನ ಬೆಡಿ ಮರ್ದ್ ದೈವ ದೇವೆರೆನ ಜಾತ್ರೆ, ಕೋಲ,ನೇಮದಂಜಿನ ಅಂಕ ಆಯನದವುಲು, ಮದಿಮೆ ಮಸಿರಿದ ಲೇಸ್ ಗ್ ಪೆರ್ಮೆದಿಂಜಾವೊಂದುಂಡು. ಇತ್ತೆಲಾ ಊರು ಪರವೂರುರ್ದ್ ಬತ್ತ್ದ್ ಕೇನ್ದ್ ಕೊನೊವೊಂದುಲ್ಲೆರ್..
ಕುಲಾಯಿ ಪಸಂತ್ರೊಡು ಬೂಬಣ್ಣನ ಬೆಡಿ ಇಜ್ಜಿಂಡ ತುಡರಪರ್ಬೊಗು ಅರ್ಥನೇ ಇಜ್ಜಿ. ತುಡರಪರ್ಬದ ಈ ಪೊರ್ತುಡು ಬೂಬಣ್ಣನ್ ನೆನೆತಿಜಿಂಡ ಪರ್ಬಗೊಂಜಿ ಪೆರ್ಮೆ ಇಜ್ಜಿ. ಬೂಬಣ್ಣನ ನೆಂಪುಡು ತುಳುನಾಡ್ದ ಸರ್ವೆರೆಗ್ಲಾ ದೀಪಾವೊಲಿ ಪರ್ಬ ಸಂತೋಸದ ಪೊಲಿಕನವಡ್.
ಬೂಬಣ್ಣನ ಬೆಡಿ ಬೋಡಿತ್ತಿನಕಲು ಈ ನಂಬರ್ಗ್ ಸಂಪರ್ಕ ಮಲ್ಪುಲೆ….ಯಾದವ್ ಮೂಲ್ಯ : 9880657519
