ಉಡುಪಿ(ಜೂ.೦೩, ಕುಲಾಲ್ ವರ್ಲ್ಡ್ ನ್ಯೂಸ್): ಕಾಪು ವಿಧಾನಸಭಾ ಕ್ಷೇತ್ರದ ಕಳತ್ತೂರು ಒಕ್ಕೂಟದ ತೃತೀಯ ವರ್ಷದ ಸಂಭ್ರಮದ ಪ್ರಯುಕ್ತ ಕರಾಟೆಯಲ್ಲಿ ರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದ ಪ್ರತಿಭೆಗಳನ್ನು ಗುರುತಿಸಿ ಸನ್ಮಾನಿಸಲಾಯಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಒಕ್ಕೂಟದ ಅಧ್ಯಕ್ಷರಾದ ಸಂಜೀವ ಕುಲಾಲ್ ಅವರು ವಹಿಸಿದ್ದರು. ಕರಾಟೆಯಲ್ಲಿ ರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆಗೈದ ಕಳತ್ತೂರು ಇರಂದಾಡಿ ಸುಗಂಧಿ ಕುಲಾಲ್ ಮತ್ತು ಸುರೇಂದ್ರ ಕುಲಾಲ್ ದಂಪತಿಯ ಸುಪುತ್ರರಾದ ಮಾ. ವಿಶಾಲ್ ಹಾಗೂ ವಿನೀತ್ ಅವರನ್ನು ಸನ್ಮಾನಿಸಿ ಗೌರವಿಸಲಾಯಿತು. ಈ ಇಬ್ಬರು ಯುವ ಪ್ರತಿಭೆಗಳು ಕಾರವಾರದ ಮಯೂರವರ್ಮ ಬೀಚ್ ನಲ್ಲಿ ನಡೆದ ರಾಷ್ಚ್ರೀಯ ಮಟ್ಟದ ಕರಾಟೆಯಲ್ಲಿ ಅಭೂತಪೂರ್ವ ಸಾಧನೆಗೈದಿದ್ದಾರೆ.
ವಿಶಾಲ್ 2 ಚಿನ್ನ ಹಾಗೂ ವಿನೀತ್ 1 ಕಂಚು ಪಡೆದಿದ್ದು ರಾಜ್ಯ ಜಿಲ್ಲಾ ಮಟ್ಟದಲ್ಲಿ ಸಾಕಷ್ಟು ಬಾರಿ ಮಿಂಚಿದ್ದಾರೆ. ಇವರಿಬ್ಬರೂ ಎಲ್ಲೂರು ಯುವಕಮಂಡಲ ಕರಾಟೆ ತರಗತಿಯ ವಿದ್ಯಾರ್ಥಿಗಳು. ಈ ಕಾರ್ಯಕ್ರಮದಲ್ಲಿ ಕಳತ್ತೂರು ಒಕ್ಕೂಟದ ಅಧ್ಯಕ್ಷರು ಹಾಗೂ ಸರ್ವ ಸದಸ್ಯರು ಹಾಜರಿದ್ದರು.
