ಕಾರ್ಕಳ(ಮೇ.೦೭): ಮದುವೆ ದಿಬ್ಬಣದಿಂದ ಜನರನ್ನು ಮರಳಿ ಕರೆತರುತ್ತಿದ್ದ ಮಿನಿ ಬಸ್ಸೊಂದು ಪಲ್ಟಿಯಾದ ಪರಿಣಾಮ ಬಸ್ಸಿನಲ್ಲಿದ್ದ ಓರ್ವರು ಮೃತಪಟ್ಟು, ಐವರು ತೀವ್ರವಾಗಿ ಗಾಯಗೊಂಡ ಘಟನೆ ಇಂದು ಪಿಲಾರುಖಾನದ ಗುಂಡುಪಾದೆ ಎಂಬಲ್ಲಿ ನಡೆದಿದೆ.
ಮೃತರನ್ನು ಅರಸಿನಕಟ್ಟೆಯ ಸುನಿಲ್ ಕುಲಾಲ್ (21) ಎಂದು ಗುರುತಿಸಲಾಗಿದೆ. ಇವರು ಬಸ್ಸಿನ ಬಾಗಿಲ ಬಳಿ ನಿಂತಿದ್ದು, ಪಲ್ಟಿಯಾದ ವೇಳೆ ಬಸ್ಸಿನ ಅಡಿಗೆ ಸಿಲುಕಿಕೊಂಡಿದ್ದರು ಎನ್ನಲಾಗಿದೆ. ಅವರನ್ನು ಹೊರತೆಗೆದು ಆಸ್ಪತ್ರೆಗೆ ಕೊಂಡೊಯ್ಯುವಷ್ಟರಲ್ಲಿ ಮೃತಪಟ್ಟಿದ್ದರು. ಬಸ್ಸಿನಲ್ಲಿದ್ದ ಇತರ ಐವರಿಗೆ ತೀವ್ರತರದ ಗಾಯಗಳಾಗಿದ್ದು ಮಣಿಪಾಲ ಕೆಎಂಸಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಬೆಳ್ಮಣ್ಣಿನ ಕೃಷ್ಣ ಸಭಾಭವನದಲ್ಲಿ ಶಂಕರಪುರ ಇನ್ನಂಜೆಯ ಭೋಜ ಕುಲಾಲ್ ಎಂಬವರ ಪುತ್ರಿಯ ವಿವಾಹ ಕಾರ್ಯ ಮುಗಿಸಿ ಹೆಣ್ಣಿನ ಕಡೆಯ ದಿಬ್ಬಣದವರನ್ನು ಶಂಕರಪುರಕ್ಕೆ ಟೂರಿಸ್ಟ್ ಟೆಂಪೋ ಟ್ರಾವೆಲರ್ ನಲ್ಲಿ ಮರಳಿ ಕರೆತರುತ್ತಿದ್ದಾಗ ಈ ಘಟನೆ ನಡೆದಿದೆ. ಬಸ್ಸಿನಲ್ಲಿ ಒಟ್ಟು 21 ಮಂದಿ ಇದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಪಿಲಾರುಖಾನದ ಗುಂಡುಪಾದೆ ತಿರುವಿನಲ್ಲಿ ಎಂಬಲ್ಲಿ ಬಸ್ಸಿನ ನಿಯಂತ್ರಣ ತಪ್ಪಿ ಪಲ್ಟಿ ಹೊಡೆದಿದ್ದು, ಚಾಲಕನ ಅಜಾಗರೂಕತೆ ಇದಕ್ಕೆ ಕಾರಣ ಎಂದು ಪೊಲೀಸರು ತಿಳಿಸಿದ್ದಾರೆ. ರಸ್ತೆಯಲ್ಲಿ ಬಿದ್ದ ಟೆಂಪೊವನ್ನು ಜೆಸಿಬಿ ಮೂಲಕ ಬದಿಗೆ ಸರಿಸಿ ವಾಹನ ಸಂಚಾರಕ್ಕೆ ಸುಗಮ ಗೊಳಿಸಲಾಯಿತು.
ಮೃತಪಟ್ಟ ಸುನಿಲ್ ಕುಲಾಲ್
