ಮುಂಬಯಿ(ಕುಲಾಲ್ ವರ್ಲ್ಡ್ ಡಾಟ್ ಕಾಮ್) : ಮಹಾರಾಷ್ಟ್ರದ ಖ್ಯಾತ ಬದ್ಲಾಪುರ್ ಆರ್ಟ್ ಗ್ಯಾಲರಿ ವತಿಯಿಂದ ನಡೆಸಲಾದ ರಾಷ್ಟಮಟ್ಟದ ಆನ್ ಲೈನ್ ಚಿತ್ರಕಲಾ ಸ್ಪರ್ಧೆಯಲ್ಲಿ ಥಾಣೆ ಸ್ಕೂಲ್ ಆಫ್ ಆರ್ಟ್ ನ ವಿದ್ಯಾರ್ಥಿನಿ ಕೃಶಿತಾ ಸಾಲ್ಯಾನ್ ಅವರು ಭಾಗವಹಿಸಿ ಪ್ರಥಮ ಸ್ಥಾನ ಗಳಿಸಿ , 50 ಸಾವಿರ ರೂ. ನಗದು ಬಹುಮಾನ ಪಡೆದಿದ್ದಾರೆ.
ಮಹಾರಾಷ್ಟ್ರ , ಹೈದರಾಬಾದ್, ಅಸ್ಸಾಮ್, ರಾಜಸ್ಥಾನ, ಪಂಜಾಬ್ ಹೀಗೆ ನಾನಾ ರಾಜ್ಯದ ಸುಮಾರು ನೂರೈವತ್ತಕ್ಕೂ ಹೆಚ್ಚು ಸ್ಪರ್ಧಿಗಳು ಭಾಗವಹಿಸಿದ್ದ ಚಿತ್ರಕಲಾ ಸ್ಪರ್ಧೆಯಲ್ಲಿ ಕೃಶಿತಾ ಸಾಲ್ಯಾನ್ ಅವರು ರಚಿಸಿದ ಚಿತ್ರ ತೀರ್ಪುಗಾರರ ಮೆಚ್ಚುಗೆ ಗಳಿಸಿ ಪ್ರಥಮ ಬಹುಮಾನ ಪಡೆದಿದೆ.
ಮೂಲತಃ ಮಂಗಳೂರಿನ ಸುರತ್ಕಲ್ ಸಮೀಪದ ಬಾಳದವರಾದ , ಪ್ರಸ್ತುತ ಮುಂಬಯಿಯ ಡೊಂಬಿವಿಲಿ ಅಂಬಿಕಾನಗರ ನೀಲಂ ಪ್ಯಾಲೇಸ್ ನಲ್ಲಿ ನೆಲೆಸಿರುವ ಕೃಷ್ಣ ಸಾಲ್ಯಾನ್ ಮತ್ತು ಯಶೋದಾ ಕೆ ಸಾಲ್ಯಾನ್ ದಂಪತಿಯ ಸುಪುತ್ರಿಯಾಗಿರುವ ಕೃಶಿತಾ ಅವರು, ಥಾಣೆ ಸ್ಕೂಲ್ ಆಫ್ ಆರ್ಟ್ ನ ನಾಲ್ಕನೇ ಸೆಮಿಸ್ಟರ್ ವಿದ್ಯಾರ್ಥಿನಿಯಾಗಿದ್ದಾರೆ.
