ಮಂಡ್ಯ(ಕುಲಾಲ್ ವರ್ಲ್ಡ್ ಡಾಟ್ ಕಾಮ್) : ಜಾತಿ-ಪಂಗಡಗಳು ವಿವಿಧತೆಯಲ್ಲಿ ಏಕತೆ ಸಾಧಿಸಿದರೆ ಮಾತ್ರ ಸಮಾಜ ಮುಂದುವರಿಯಲು ಸಾಧ್ಯ ಎಂದು ಮಾಜಿ ಸಂಸದ ಜಿ.ಮಾದೇಗೌಡ ತಿಳಿಸಿದರು.
ನಗರದ ಗಾಂಧಿ ಭವನದಲ್ಲಿ ಕರ್ನಾಟಕ ರಾಜ್ಯ ಕುಂಬಾರ ಸಮಾಜ ಮತ್ತು ಕುಂಬಾರರ ಜಾಗೃತ ವೇದಿಕೆ ಮಂಡ್ಯ ಘಟಕದ ಸಹಯೋಗದಲ್ಲಿ ಆಯೋಜಿಸಿದ್ದ ನಾನಾ ಕ್ಷೇತ್ರದ ಸಾಧಕರು, ಪ್ರತಿಭಾನ್ವಿತರು ಮತ್ತು ಹೋರಾಟಗಾರರಿಗೆ ರಾಜ್ಯಮಟ್ಟದ ಸರ್ವಜ್ಞ ಪುರಸ್ಕಾರ, ಜಿಲ್ಲಾಮಟ್ಟದ ಕುಂಭರತ್ನ ಪ್ರಶಸ್ತಿ ಪ್ರದಾನ, ಕ್ಯಾಲೆಂಡರ್‌ ಬಿಡುಗಡೆ ಮತ್ತು ಅಭಿನಂದನ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.
ಭಾರತ ದೇಶ ಜ್ಯಾತ್ಯತೀತ ರಾಷ್ಟ್ರವಾಗಬೇಕೆಂಬುದು ಸಂವಿಧಾನ ಶಿಲ್ಪಿ ಡಾ.ಬಿ.ಆರ್‌.ಅಂಬೇಡ್ಕರ್‌ ಅವರ ಆಶಯಗಳಲ್ಲೊಂದಾಗಿದ್ದು, ಕುಂಬಾರರು, ಬ್ರಾಹ್ಮಣರು, ದಲಿತರು ಸೇರಿದಂತೆ ಇತರೆ ಜಾತಿಗಳು ಒಗ್ಗಟ್ಟಾಗಿ ಮುನ್ನಡೆದು, ಜಾತಿವಾದದ ಸಂಕೋಲೆಯಿಂದ ಹೊರಬರಬೇಕು. ತಳ ಸಮುದಾಯಕ್ಕೆ ಸೇರಿದ ಮಕ್ಕಳಿಗೂ ಶಿಕ್ಷಣ ದೊರೆಯಬೇಕೆಂಬ ಉದ್ದೇಶದಿಂದ ಸರಕಾರ ಕಡ್ಡಾಯ ಶಿಕ್ಷಣ ಪದ್ಧತಿಯನ್ನು ಜಾರಿಗೊಳಿಸಿದ್ದು, ಪೋಷಕರು ಮಕ್ಕಳಿಗೆ ವಿದ್ಯೆ ಕಲಿಸಲು ಮುಂದಾಗಿ ಶೈಕ್ಷಣಿಕ ಪ್ರಗತಿಗೆ ಸಹಕಾರಿಯಾಗಬೇಕು ಎಂದು ಸಲಹೆ ನೀಡಿದರು.
ಮೈಸೂರಿನ ಕ್ರೆಡಿಟ್‌ ಐ ಸಂಸ್ಥೆಯ ಸಿ.ಇ.ಓ ಎಂ.ಪಿ.ವರ್ಷ ಮಾತನಾಡಿ, ಪ್ರಪಂಚಕ್ಕೆ ಮಾನವತೆಯ ಸಂದೇಶ ಸಾರಿ, ಸಮಾಜದ ಅಂಕು-ಡೊಂಕುಗಳನ್ನು ಸಾಹಿತ್ಯದ ಮೂಲಕ ತಿದ್ದಿದ ತ್ರಿಪದಿ ಕವಿ ಸರ್ವಜ್ಞರ ಹೆಸರಿನಲ್ಲಿ ರಾಜ್ಯ ಸರಕಾರ ಪ್ರಾಧಿಕಾರ ಸ್ಥಾಪಿಸಬೇಕು ಎಂದು ಒತ್ತಾಯಿಸಿದರು. 15ನೇ ಶತಮಾನದ ಆಂಧ್ರಪ್ರದೇಶದ ಮಹಾ ಕವಿ ಮೇಮನ, ತಮಿಳು ಸಂಗಮ ಸಾಹಿತ್ಯಕ್ಕೆ ಬಹು ದೊಡ್ಡ ಕೊಡುಗೆ ನೀಡಿದ ತಮಿಳುನಾಡಿನ ತಿರುವಳ್ಳವರ್‌ರಂತಹ ಕವಿಗಳು ದೇಶದಲ್ಲಿ ಅಪಾರ ಕೀರ್ತಿ ಮತ್ತು ಹೆಸರು ಗಳಿಸಿದ್ದಾರೆ. ಆದರೆ, ಕನ್ನಡ ಸಾಹಿತ್ಯ ಮತ್ತು ಸಾಂಸ್ಕೃತಿಕ ಕ್ಷೇತ್ರದ ರಾಯಭಾರಿ ಸರ್ವಜ್ಞರನ್ನು ರಾಜ್ಯದಲ್ಲಿ ಮೂಲೆಗುಂಪು ಮಾಡಲಾಗಿದೆ. ಸರಕಾರ ಅವರ ಹೆಸರಿಗೆ ಗೌರವ ತಂದು ಕೊಡಲು ಸರ್ವಜ್ಞ ಸಾಹಿತ್ಯ ಕ್ಷೇತ್ರದ ರಾಯಭಾರಿ ಎಂದು ಘೋಷಣೆ ಮಾಡಬೇಕು ಎಂದು ಆಗ್ರಹಿಸಿದರು.
ಕುಂಬಾರ ಸಮುದಾಯವು ಸರ್ವಜ್ಞ ತಮ್ಮ ಪ್ರತಿನಿಧಿ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳಬೇಕು. ಪ್ರತಿದಿನದ ಕೆಲಸ ಕಾರ‍್ಯಗಳನ್ನು ಸರ್ವಜ್ಞರಿಗೆ ನಮಿಸಿ ಪ್ರಾರಂಭಿಸಬೇಕು. ಆರ್ಥಿಕವಾಗಿ ಬಲಿಷ್ಠರಾಗಿರುವವರು ಸಮುದಾಯದ ಏಳಿಗೆಗಾಗಿ ಕಾರ‍್ಯಕ್ರಮಗಳನ್ನು ರೂಪಿಸಿ, ಸೇವಾ ಮನೋಭಾವ ಮೆರೆಯಬೇಕು. ಆರ್ಥಿಕವಾಗಿ ಸಧೃಡರಾಗಿಲ್ಲದವರು ಆಳುಗಳಂತೆ ದುಡಿಯುತ್ತಾ, ಭವಿಷ್ಯದ ದಿನಗಳಲ್ಲಿ ಅರಸರಾಗಿ ಬಾಳಬೇಕು ಎಂದು ಸಲಹೆ ನೀಡಿದರು. ಇದುವರೆಗಿನ ಸರಕಾರಗಳು ಕುಂಬಾರ ಸಮುದಾಯಕ್ಕೆ ಸಚಿವ ಸ್ಥಾನ ನೀಡಿಲ್ಲ. ಪ್ರತಿಬಾರಿ ಸಂಪುಟ ರಚನೆ, ವಿಸ್ತರಣೆಯಾಗುವ ವೇಳೆ ನಮ್ಮ ಸಮಾಜದ ಶಾಸಕರಿಗೆ ಮಂತ್ರಿಗಿರಿಯ ಯೋಗ ಲಭಿಸುತ್ತಿಲ್ಲವಲ್ಲ ಎಂಬ ಕೊರಗ ಕಾಡುತ್ತಿದೆ. ಈ ನೋವನ್ನು ನೀಗಿಲು ಕುಂಬಾರ ಸಮುದಾಯದ ಸಂಘಟನೆಗಳು ಹಣದ ಹಿಂದೆ ಹೋಗುವುದನ್ನು ಬಿಟ್ಟು ಸಮರ್ಥ ನಾಯಕ ಉದಯಕ್ಕೆ ಕಟಿಬದ್ಧರಾಗಿ ದುಡಿಯಬೇಕು ಎಂದು ಹೇಳಿದರು.
ಇದೇ ವೇಳೆ ಕುಂಬಾರರ ಜಾಗೃತಿ ವೇದಿಕೆ ಜಿಲ್ಲಾಧ್ಯಕ್ಷ ಎಂ.ಕೃಷ್ಣ ಕ್ಯಾಲೆಂಡರ್‌ ಬಿಡುಗಡೆ ಮಾಡಿದರು. ಧಾರವಾಡ ಜಿಲ್ಲೆ ನವಲಗುಂದ ಉಪವಿಭಾಗದ ಪಂಚಾಯತ್‌ ರಾಜ್‌ ಎಂಜಿನಿಯರ್‌ ಬಸವರಾಜು ಚಕ್ರಸಾಲಿ, ಕರ್ನಾಟಕ ಜನ ಸೈನ್ಯ ಸಂಘಟನೆಯ ರಾಜ್ಯಾಧ್ಯಕ್ಷ ಎರೀಸ್ವಾಮಿ, ಬೆಂಗಳೂರು ಭವಿಷ್ಯ ನಿಧಿ ನಿವೃತ್ತ ಲೆಕ್ಕಾಧಿಕಾರಿ ಸೋಮಶೇಖರ್‌ ಅವರಿಗೆ ರಾಜ್ಯಮಟ್ಟದ ಸರ್ವಜ್ಞ ಪ್ರಶಸ್ತಿ ನೀಡಲಾಯಿತು. ಮಹೇಶ್‌, ದೊಡ್ಡಯ್ಯ, ಎಂ.ಜೆ.ಮಂಜುಶೆಟ್ಟಿ, ಮಹದೇವಶೆಟ್ಟಿ, ಚಿಕ್ಕನಿಂಗಶೆಟ್ಟಿ, ಜವರಾಯಶೆಟ್ಟಿ ಅವರಿಗೆ ಜಿಲ್ಲಾಮಟ್ಟದ ಕುಂಭರತ್ನ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ನಗರಸಭೆ ಸದಸ್ಯೆ ಮಂಗಳ ಪುಟ್ಟಸ್ವಾಮಿ ಅವರನ್ನು ಅಭಿನಂದಿಸಲಾಯಿತು. ಕೋಲಾರ ಜಿಲ್ಲೆಯ ಕುಂಬಾರರ ವಿದ್ಯಾರ್ಥಿ ನಿಲಯದ ಅಧ್ಯಕ್ಷ ತಬಲನಾರಾಯಣಪ್ಪ, ರಾಜ್ಯ ಕುಂಬಾರರ ಸಮಾಜದ ಪ್ರಧಾನ ಕಾರ‍್ಯದರ್ಶಿ ಶಂಕರ್‌ಶೆಟ್ಟಿ, ಪತ್ರಕರ್ತ ಸೋಮಸುಂದರ್‌, ಡಿ.ದೇವರಾಜು ಅರಸು ಹಿಂದುಳಿದ ವರ್ಗಗಳ ವೇದಿಕೆ ಜಿಲ್ಲಾಧ್ಯಕ್ಷ ಎಲ್‌.ಸಂದೇಶ್‌, ಕೊಡಗಹಳ್ಳಿ ಬಸವರಾಜು, ನಾಗಮಂಗಲ ಎಂ.ಕುಮಾರ್‌ ಮತ್ತು ಇತರರು ಹಾಜರಿದ್ದರು.
